22nd Inter Branch YMA Football Tournament chu a liam ta vung vung mai chu a ni sia, ni hnih thum lek liamta khan Final khel mah se, a ngaihawm khawp mai.
Kumin YMA Football Tournament-ah hian chanchin ngaihnawm deuh deuh, hriat reng tawh tur a awm nual. Thil hlimawm deuh deuh te a thleng a, match ropui tak tak te, social media lama insawiselna nasa tak tak te a thleng nawk mai.
Round tir lamah Zobawk Vengtharin 23-0 laiin Upper Republic an han sawp te kha, social media lamah a darh nasa. Chutah Armed Vengin an hneh loh ve leh bawk, Zobawk Vengthar lakah complaint a lut, chhim lam team tha an disqualify ta a.
Tla tawh Armed Veng an khel nawn leh, phur takin Chite Play Ground lamah an inhawr khawm. Serchhip Vengchung chuan penalty shootout hmangin an han pet thla nawn leh sak a nih kha.
Lungdai team kha an tha tih kan hriat tanna chu Ramhlun South an hneh dan atang khan a ni. Muallungthu lamah Lungdai chuan penalty shootout hmangin team tha tak Ramhlun South an hneh. An kal chho zel a, Armed Veng South erawh an paltlang zo ta lo.
RG Stadium-a Lungdai leh Armed Veng South inkhel zet kha zawng, social media lamah sawiselna a tam kher mai. Hun pek belh minute 10 a ni a, minute 11-ah Armed Veng South lamin an siphurh an rul, penalty shootout hmangin Armed Veng South an chak a nih kha.
Semi final match-a Durtlang leh Republic Veng inhmachhawn zet kha chu a va hmuhnawm tak em! Si 2 faiin Republic Vengin hma an hruai, hun tawp dawn tak tak minute 88 leh 90+3 minute-ah Durtlang chuan goal ropui bik hmangin an siphurh an rul.
Penalty shootout hmangin chak zawk an zawng tawh dawn emaw tih laiin, extra time added time-ah C. Hriata chuan free kick atangin mawi takin Republic Veng chakna goal a khung a nih kha.
Round tir lamah mual hrang hrangah inkhel a awm, Mizo Youtuber thenkhatin an live, PC Lala leh Vanlalpianga te Live chu mipuiin kan hlut hle a, ka en nasa em em bawk. Chutah Zonet lamin official-in an han broadcast a, Zosailova leh Johna te an lar ta.
Zonet commentator a tha hle, player te a sawi dik chat chat bawk a, chutah Johna leh Zosailova te hming a lam hnem ta malh malh. Youtube chat-ah anni pahnih hming hi an han spam tak tak mai chu, an hmel la hmu miah lo pawhin an hming an hre thei a nih kha.
Tin, heti hi a ni a, team 154 telna LBS Suzuki 22nd Inter Branch YMA Football Tournament 2025 chu ropui takin khar a ni a, final-ah Republic Veng leh Bethlehem Vengthlang te hun pangngai leh extra time-ah 1-1 in an inhnehtawk. Final duhthusam kan sawi thin angin penalty shootout hmanga chak zawk zawn a ni a, Republic Veng an champion ta a ni.