Swedish striker Zlatan Ibrahimovic chuan chanchinthar danglam tak a nei leh ta. He PSG striker hian Stockholm ah ama pualin biakin 9.4million pounds in a lei leh ta rup mai. Hei hi an ram pawisa chuan 110 million krona vel ni a chhut a ni.
Mahni in rintawkna a ngah lutuk avanga Pathian ang hiala a inchhal thin avangin hemi chungchangah hian mi tamtak chuan Zlatan hi mahni kohhran din a, sakhaw hruaitu nih tum ang deuhin thu an thehdarh chiam a; thil mak a ni hranlo e, Pathian tluk zeta dah sangtu fans a ngah em bawk a ni. He biakin a lei chhan tak erawh football a chawlhsan huna in bengbel nana a in hmakhua lawk duh vang a ni.
Zlatan tih hming hi Swedish tawng chuan “rangkachak” tihna a nih ang ngeiin he football star hian a chenna tur in pawh a duh hautakin a duhtui hle niin a lang. Miten urhsun taka Pathian an biakna hmuna thlamuang taka in bengbel chu a duhthusam a nih thu a sawi mauh mai.Hetih lai hian PSG fans tamtak chuan an footballer ngaihsan em em a taka an ‘biakna’ hmun atan a biakin lei chu tha an tih thu an lo sawi ve bawk.
Mi tamtakin football khawvela hming a chher tanna Malmo a a in bengbel an rin laiin he footballer chanchin nei danglam thei tak mai hian Stockholm chu vahvel a awlsamin a lifestyle nen pawh a in mil zawk thu a sawi a. Zlatan hian Malmo a a khelh laiin English club lian Arsenal lama lut turin ruahmanna an siam vek tawh hnuah a thulh leh thut mai a; Arsenal tana a khelh lehloh nachhan hi Wengera’n trial nei tura a phut chu a tihlawhtlin duhloh vang a ni.