Zirtawpni zan khan Euro 24 qualifier match-ah Belgium chuan Sweden an tlawh a, Inter striker Lukaku chuan hattrick a siam.

He match-ah hian kum 41 mi Zlatan Ibrahimovic chu second half-ah lut mah se, a ram tan danglamna a siam thei ta lo a ni.

Zlatan hian kum 41, thla 5 leh ni 21 a nihin ram tan a inlan leh a, European Championship qualifier-a inlan thei upa ber record a siam ta a ni.

Kar hmasa khan Zlatan chuan Serie A history-a goal khung thei upa ber record a lo siam tawh bawk a, engtia rei nge Sweden tan a khelh zel dawn tih sawi lawk theih a ni lo.

He match-ah hian tunlaia che tha lo leh, sawisel hlawh tak Lukaku chuan hattrick a siam. Goal hmasa ber hi minute 35-a lut a ni a, mual dinglam sir atanga Lukebakio cross chu Inter striker hian bottom corner-ah a tauh lut.

Second half minute 49-ah box dinglam sir atanga Lukebakio cross chu hnai tak atangin a shot a, Lukaku-a shot hi Lindelof chuan a dang chhuak zo lo.

Minute 82-ah mual dinglam sir atanga Bakayoko cross chu Lukaku chuan awlsam takin a chhuih goal, hattrick a siam ta a ni.

Romelu Lukaku hian ram tan game 105 a khel tawh a, goal 71 a khung tling ta a ni.