Manchester United chuan 2024-25 Premier League season-a an game hmasa berah, si khat faiin Fulham an hneh a, goal awmchhun khungtu hi Bologna atanga an lei thar Joshua Zirkzee a ni.

United boss Erik ten Hag chu a forward thar khelh danah a lawm hle a, an tana player tangkai tak a nih chhunzawm zel a ring.

Old Trafford-ah striker pangngai hmang loin Ten Hag chuan inkhelh bul a tan, Bruno Fernandes chu striker angin a chhawr. Second half minute 61-ah Ten Hag chuan Zirkzee a dah lut a, Dutch forward hian goal attempt vawi khat a neihah goal a khung nghal.

"Striker te tan goal khung hi a pawimawh khawp mai. A awmna hmun turah tak a awm a, goal a khung a, kan chak phah ta a ni. Team tana tha thawh hlawk thei turin theihna sang tak a nei bawk.

"A khelh dan tur ka ruahman angin a khel a, box chhunga lut tur leh goal khung turin kan ti a, a hna a hlen ta a ni. Player dang te nen an inman chho nghal em em a, hei hi kan lei chhan chu a ni.

"Subs kan siam te khan game-ah danglamna an siam a, kan game hmasa berah kan subs ten hna thawkin, hnehna kan chang nghal.

"Kan team rilru put hmang a dik em em bawk a, Fulham kha hmachhawn an harsa a, chuti chung chuan na takin kan nawr a, chance kan siam teuh bawk a, goal kha khung hma tur chu kan ni mawle, chu chiah chu kan khelh dana ka sawisel chu a ni," tiin Ten Hag chuan a sawi.

Goal khungtu Zirkzee chuan, "United tan ka game hmasa berah goal ka khung a, kan chak bawk a, hei aia bul tan that dan hi a awm bik chuang lo ang.

"Stretford End lama goal khung hi a ropui bik zia min hrilh a, ka game hmasa berah khatiang ka tawng kha a ropui a, tawnhriat hlu leh nuam tak a ni chiang.

"A pawimawh ber chu kan chak a, chak hi kan duh ber a ni, ka rilru put hmang leh ka awm dan tak hi sawi thiam a har.

"He team-ah hian ka leng nghal halh mai, team ropui tak a ni. Thil ropui tak hlawhchhuah kan tum mek a ni," tiin a sawi.