Zinedine Zidane chuan Chelsea midfielder N'Golo Kante chu a hmutai hle a, kum thar nipui transfer window a inhawn leh hunah chuan lak luh ngei a tum dawn niin an sawi.

Chelsea hi Real Madrid chuan an dawr ve ta nual a, nipui vawi hnih chhung chu player an lo leisak tawh a. 2018 nipui lai khan Thibaut Courtois an lei a, kumin nipui laiin Eden Hazard chu Stamford Bridge atangin Santiago Bernabeu lamah an suan chhuak bawk a ni.

The Athletic-in an tarlan danin La Liga club lian Real Madrid chuan Chelsea chu dawr leh ngei an tum dawn niin an tarlang a. Tun season tawpah French midfielder N’Golo Kante chu Stamford Bridge atanga lak chhuah dan ngaihtuah an tum niin an tarlang.

Real Madrid hian midfielder tha tak mai lak an tum ve deuh reng a, Manchester United midfielder Paul Pogba chu an duh thlan ber niin, French midfielder Pogba lak tum hian hma pawh an la a. Amaherawhchu, an tum angin thil a kal thei ta chiah lo a, player chuan Old Trafford chhuahsan duh mah se a thei ta rih lo a ni.

An lak duh ber mai an lak theih tak loh avang hian Real Madrid chuan hmun dangah mit an len zui a, midfielder rinrawl tur atan hian N’Golo Kante hi an thlang deuh ta niin an sawi a. Pogba leh Kante te chu an khelh dan inang lo viau mah se a position anga khel zingah chuan khawvela a tha ber pawl niin an sawi a ni.

Kar hmasaa an tih chhuah, mi 55 awmna FIFPRO World XI ah khan Kante hi a tel ve a, Chelsea player zingah chuan tel thei awm chhun a ni nghe nghe a. Hetianga an thlan chhuah theih nalh danah hian Kante chu khelmualah a zahpuiawm lo hle tihna a ni thei ang.

Nipui inher chhuah tih lampangah khan Kante chuan Europe khawmualpuia club lian thenkhatin an hmutai leh an beisei chu lawmawm a tih thu a sawi chhuak.

Kante chuan, “Europe khawmualpui club lian thenkhatin min lo ngaihven ve hi ka tan chuan a lawmawm khawp mai a, coach te’n an ruahmannaa min hman tangkai an duh ve hi chuan thil tha tak a ni a. Tunah tak hi chuan ka duhthlannaah hian ka lung a la awi hle a, Chelsea hi nuam ka la ti a. Season tharah pawh Chelsea-ah hian hun hman zui zel ka duh a ni,” a ti.