France tana World Cup no mawi lo chawi tawh Zinedine Zidane-a fapa Luca Zidane chuan a ram a thlak a, France ram hawisanin a pate chawr chhuahna ram Algeria tana khelh a thlang ta zawk.

Luca Zidane hi goalkeeper a ni a, kum 27 mi hi France tan youth level lamah a inlan nual, hetih lai hian inkhelhna hmun a chan theihna tur Algeria ram tana khelh a thlang ta zawk a ni.

Ram a thlak chungchangah hian Fifa chuan a pawmpui tawh a, a pa hnung zuiin World Cup-ah a inlan thei dawn niin a lang. Algeria hian World Cup 2026 khelh an hnaih tawh hle a, thla lehah hian qualifier match-ah Somalia an hmachhawn ang a, heta an chet that chuan World Cup an khel thei dawn a ni.

Zinedine Zidane hian fapa 4 a nei a, Luca hi upa ber dawttu niin, an unau li hian Real Madrid academy-ah an kal thin a, Luca hi Spanish second division club Granada tan a khel mek.

La Liga lamah pawh tawnhriat a lo nei tawh a, Real Madrid tan vawi hnih a inlan hman a, Rayo Vallecano lamah hun a lo hmang hrep tawh bawk.

Zinedine Zidane hi Algeria rama Kabylie rama piang a ni a, hei vang hian Luca pawh Algeria tan a khelh theih phah dawn a ni.

Zinedine hi France footballer ropui ber zinga chhiar tel a ni a, 1998 World Cup final-a Brazil an hneh khan goal hnih a khung. Hetih lai hian 2006 World Cup final-ah erawh a mualpho hle a, Italy hmachhawnin red card a chawi a, ram tana inkhelh a chawlhsan chhunzawm ta a ni.