Lionel Messi-a'n a tet laia thla a lakpuina chu tun Euro-ah nasa takin a lar a, kum 16 mi chauh niin Euro-ah a rawn chetha em em, final hma niah kum 17 a tling a, an champion zui bawk. Barcelona winger hi Euro 2024 Young player of the Tournament atan thlan a ni nghe nghe.

Mi tam takin New Messi tiin an sawi bawk a, hetih mek lai hian mi thenkhat chuan Ansu Fati hnung zui tur niin an lo sawi bawk a, he thil hian ngaihtuah a tithui khawp mai. Fiamthu angin lang mah se, thil ni thei tak chu a ni dawn a ni. 

Barcelona hian Academy chhuak player tha tak tak an nei thin. Naupang te ni chungin ropui takin an khel thei a, mite fak hlawhin, New Messi tih hming pawh pu an awm nawk a nih kha. Mahse tun hnaia La Masia chhuak player tha te hian harsatna lian tak an tawk ta nawk mai.

Ansu Fati pawh kha talent nei tha tak a ni, Messi-a'n PSG a pan takah khan number 10 a rochun nghe nghe. Mahse tunah chuan kum 21 mi lek ni chungin loan-a thehchhuahna tur Barcelona lamin an zawng reng.

Barcelona player naupang leh inhliam hi thil inzawm tlat niin a ngaih theih. Fati hi a inhliam ngun em em, 19/20 season-ah ni 22 a inhliam. 20/21 (312 days), 21/22 (181 days), 22/23 (6 days) leh 23/24 (69 days) te hi a injury records chu a ni.

Pedri pawh a inhliam nual mai. 21/22(197 days), 22/23 (110 days), 23/24 (128 days), 24/25 (30 days) heng te hi Pedri injury records a ni.

Gavi pawh talent nei tha tak ni mah se, ani pawh a inhliam nasa. 20/21 (26 days), 21/22 (18 days), 23/24 (269 days) heng te hi Gavi injury records a ni.

Heng player naupang pathum kan rawn tarlan tak te hi talent nei tha tak tak, Messi tluk hial tura thiamna nei nia sawi thin ni mah se, inhliam avangin an nih tur ang an ni phak lo ti ila kan sawi sual lo ang.

Tunah Barcelona chuan kum 17 mi lek player tha tak Lamine Yamal an nei, ani pawh hian heng player naupang hnung hi a zui ang tih a hlauhawm hle.

Fati, Gavi leh Pedri te inhliam nasat chhan nia an ngaih chu, Barcelona hian sum lamah harsatna an tawk nasa a, sum tam tak sengin player man to an la lut hleithei lo. Heng vang hian Academy graduate te an chhawr rim phah.

Naupang te ni chungin game an khel nasa a, hei vang hian an inhliam nasat phah a ni an ti. Hei hi thil dik pawh a nih a rinawm hle. 

Sum lamah Barcelona an la buai chhunzawm zel, loh theih lohin Lamine Yamal pawh an chhawr chho leh dawn niin a lang a, Ansu Fati, Pedri leh Gavi te angin a naupang te ni chungin hliam na tak a neih palh a hlauhawm.