RB Leipzig chuan Xavi Simons chu London pan an phalsak ta a, Tottenham chuan kum 22 mi hi lak tumin hma an la a, Spurs hian an la ngei dawn niin a lang ta.

Morgan Gibbs-White leh Eberechi Eze te an lak theih tak lohah chuan Thomas Frank chuan hmanhmawh takin Xavi Simons lam a hawi a, transfer tawpni September ni 1 hma ngeia inlak fel hman an tum dawn a ni.

Chelsea khan Simons kha an ngaihven reng a, indawrna pawh thui tak an kalpui. Hetih lai hian player hralh an mamawh avangin an duhthusam angin Chelsea an che thei lo a, tunah chuan an forward Christopher Nkunku chu AC Milan lamah an hralh dawn ta a, Xavi Simons pawh hi an ngaihven thar leh thut maithei.

Tun nipui bazar zet chu Tottenham leh Newcastle United-in an duhthusam player an la thei lo. Xavi Simons pawh hian London pan pawh ni se, Tottenham a pan kher dawn em tih erawh kan sawi lawk thei lo. Chutih laiin Tottenham nena indawr turin London a pan dawn tih chu The Athletic tarlan dan chu a ni a.

RB Leipzig khan Simons an chhuahtir phal lawk lohna chhan chu, a man atana an chhiar zat an rawn thehchhuah loh chuan hralh an tum lo kha a ni a, Tottenham hian RB Leipzig chhiar zat an pe phal niin a lang mek a ni.

Netherlands International hian January thla khan Paris Saint-Germain atangin RB Leipzig a pan a, an inleina kha €50million a ni. Bayern Munich pawhin Simons hi an ngaigven a, mahse Simons hian Bundesliga chhuahsan a thlang ta zawk a ni.

Chelsea hian Simons hi an la ngaihven tho em tih chu sawi theih a ni rih lo. Manchester United atangin winger Alejandro Garnacho lak an tum mek a, €40m velin an inlei dawn niin report a awm mek. Tin, Barcelona atangin Fermin Lopez pawh an ngaihven bawk a, heng te a nih avang hian Xavi Simons hi an ngaihven lo maithei a ni.

Tottenham hian Simons hi an mamawh hle niin a lang a, an playmaker James Maddison chu khup hliam avangin tun season hun tam zawk a inkhel thei dawn lo. Gibbs-White leh Eze te lak tumin hma la mah se, an la thei bawk si lo a, chuvang chuan a kaw tawpah an tang dawn tihna a ni a, Simons hi an lak ngei chu a rinawm a ni.