Women’s Tennis Association (WTA) chuan British number one Emma Raducanu chu Newcomer of the Year atan an thlang.

Kum 19 mi hian kumin khan beisei loh takin US Open title a la a, qualifier ni chunga Grand Slam title la thei hmasa ber niin, khawvel hriat a hlawh tan.

Kumin kum tir khan Raducanu hi world ranking-ah 343-na a ni a, kum a tawp meuh chuan 19-naah a inhlangkai thei a, WTA-in Newcomer of the Year atana an thlang hi a phu hliah hliah a ni.

World number one ni lai Australian player Ashleigh Barty chu WTA Player of the Year atana thlan a ni a, kum 25 mi hi kum 2019 pawh khan WTA Player of the Year atana thlan a lo ni tawh bawka, kumin khan Wimbledon-ah champion a ni.

Czech player pahnih Barbora Krejcikova leh Katerina Siniakova te chu Doubles Team of the Year atana thlan a ni a, an pahnih hian kuminah Olympic gold medal la in, Roland Garros-ah an champion bawk.

Krejcikova hi Most Improved Player of the Year-a thlan a ni tel bawk a, Spanish player Carla Suarez Navarro chu Comeback Player of the Year lawmman hlan a ni bawk a ni.

Suarez Navarro hi nikum September thla khan cancer chi khat Hodgin lymphoma a nei tih hmuhchhuah a ni a, mahse kumin April thla khan Navarro hian a dam thu puangin, French Open leh Wimbledon-ah te a inlan a, hemi hnu hian inkhelh a chawlhsan zui ta a ni.