World Cup: Batshuayi-a’n Belgium a chakpui

24th November 2022, 03:11AM

Nilaini zanlai khan, Qatar World Cup group F inkhelah Belgium leh Canada te an inhmachhawn a, Belgium hian Michy Batshuayi goal khat hmangin hnehna an chang.

Canada hian an history-ah World Cup game li an khel tawh a, an khelh tawh chinah goal vawi khat mah an la khung lova, an World Cup game hmasa palia goal khung thei lo awmchhun an ni.

Group F-ah hian Croatia leh Morocco te nen Belgium leh Canada te hi an awm ho a, khelh khat theuh an khelh hnuah point 3 nei awmchhun Belgium chu pakhatna niin, Croatia leh Morocco ten an dawt a, point la nei lo awmchhun Canada chu palinaah an awm ve thung.

Canada hi an khel tha viau a, mahse an tlarhma lam player te an selfish tih theih a ni a, chance pawh an nei hnem a, goal erawh 90mins chhungin an khung thei lova, an tlawm zui ta a ni.

Tan atanga minute sawm vel an khelhin, Belgium player Yannick Carrasco chu box chhunga a hand ball avangin Canada hian penalty an hlawhchhuak a, Canada star player Alphonso Davies chuan penalty hi hlahin Canada hmahruaipui theihna hun tha tak a bawhpelh a,  Belgium goalkeeper Thibaut Courtois chuan a penalty hi a save sak.

Canada tlarhma lam an tlanchakin, an che rang a, Belgium tlarhnung palian leh upa tawh lam an talbuai lek lek thin a, Canada hian hmahruai theihna hun tha vawi eng emaw zat nei mah se, an hun tha neih an hmang tangkai thei lo.

Goal awm lovin first half a tawp dawn emaw tih hnuah, goal nawr na lo zawk Belgium in goal an rawn khung a, Toby Alderweireld-a long ball chu Batshuayi chuan goal-ah a lo pet lut a, inkhela goal awmchhun leh Belgium chakna goal ni bawk thunin, Belgium hian point 3 pawimawh tak an hlawhchhuak.

Belgium hian World Cup group stage inkhel bikah a zawnin vawi 8 hnehna an chang ta chiah a, Brazil nen chiah World Cup group stage-a a zawna vawi 8 chak thei an awm.

Canada captain Atiba Hutchinson hi kum 39 mi niin, kumin World Cup-a outfield player upa ber a ni a, hei hi a vawi khat World Cup khelhna a ni bawk.

Belgium hian Sunday lo awm tur zanah hian Morocco an hmachhawn dawn a, December thla ni 1-ah Croatia nen an inhmachhawn leh bawk ang. Canada hian Sunday zanah Croatia an hmachhawn anga, December thla ni 1-ah Morocco an hmachhawn leh bawk dawn a ni.

Copyright © inkhel.com 2022. All rights reserved.