Vawiin tlai dar 3:30 a Qatar World Cup Group F inkhelah Hakim Ziyech-a te ram Morocco leh Luka Modric captain-na hnuaia khel Croatia te goal awm loin an inhnehtawk.
Morocco tan Chelsea midfielder Ziyech bakah, Paris Saint-Germain full-back Achraf Hakimi te, Bayern Munich full-back Naussair Mazraoui te leh Sevilla striker Youssef En-Nesyri te an inlan a.
Croatia tan captain Luka Modric bakah Chelsea midfielder Mateo Kovasic leh Tottenham attacking-midfielder Ivan Perisic te an inlan ve thung.
He inkhelah hian first-half lamah midfielder nei ṭha zawk Modric-a team te’n inkhel an thunun zawk a, remchang erawh an insiam hlei thei lo. Croatia talbuai chang nangching hian Morocco lam hian remchang insiam ve zeuh zeuh mah se goal-ah an chantir thei bik chuang lo.
First-half tawp hma 45mins ah hian Crotia lamin goal thun theihna remchang an winger Nikola Vlasic hmangin an nei a, mual sir veilam aṭanga an side-back Borna Sosa ball pek luh ṭha zet chu Vlasic hian lo tlawh fuh mah se Morocco goalkeeper Yassine Bounou chuan a lo dansak. Hemi hnu lawkah hian Real Madrid midfielder Modric pawhin box pawn vel chiah aṭangin kawh zeta goal zawna a pet chu goal ban chungah a kal.
Second-half tir lamah Morocco rawn insiamṭhain goal thun tum viau mah se Croatia tlarhnung an paltlang zo meuh lo. Minute 50-naah Morocco full-back Mazraoui chuan goal thun theihna remchang nei mah se a tauh lut lo a, hemi hnu lawk hian Bayern full-back hi inhliam avangin zawn chhuah a ngai.
Morocco full-back tlan chak Hakimi chuan chak taka a ball tlanluhpui chu mual sir dinglam aṭangin a thawn lut a, Morocco hmatawngte’n goal-ah an chantir zo lo a, Morocco free-kick hmuh Hakimi pet kawh zet chu Croatia goalkeeper Dominik Livakovic tan dan harsa a ni lo.
Croatia lam hi second-half tir lamah talbuai deuh mah se rei an talbuai duh bik lo a, inkhel thununtu zawk ni lehin goal awm loin inkhel a tawp ta a ni.
Morocco leh Croatia te hi Group F ah awmin point khat ve ve an nei ta a, Belgium leh Canada te an la hmabak. Anni pahnih hian zanin zanlai dar 12:30 ah an match hmasa ber an khel ve thung dawn a ni.