World Athletics Council chuan an hnuaia intihsiakna awmah nihna thlak (transgender) tel an phal dawn lo.

An pawl president Sebastian Coe chuan til pawr aw neite tan hmeichhe intihsiaknaah tel an phal lo tih a sawi a, tun thla tawpa neih tur Female World Ranking Competition-ah pawh an fimkhur dawn tih a sawi.

Intihsiakna an neih turah hian nihna thlak an tel leh tel loh uluk takin an en dawn a, an ni ho tan hian intihsiakna dang buatsaih an rilruk. World Athletics Council hian nihna thlak hmeichhiate tan intihsiaknaa tel theihdan an nei a, zawm theihloh khawpa harsa ani thung niin an sawi.

An danah hian hmeichhia ang chiah ni turin an phut ani ber a, hamthatna an neih theih bik an hlau hle. Coe chuan hmeichhe dangte an venthawn avangin dan khauh an nei tih a sawi a, nihna thlakte tan hian intihsiakna a awm rih lo tih a sawilang tel bawk.

World Athletics Council hian doping chungchanga Russia an hremna an hlip a, Ukraine nena an la buai mek avangin an la hrem zui zel thung. Russia hian 2015 Sahmulphah thla khan doping dan an bawhchhia tih hriatchhuah a ni a, an ram sawrkar hriatpuina anih avangin World Athletics Council an thinrim hle.

Ukraine an do avanga Russia an hremna erawh an hlip tel lova, an thawhpui Belarus pawh hrem zui ve zel an la ni ang. Doping chungchanga an hremna hi Ningani khan an sut a, Russian Athletics Federation-in dan an zawm famkim tawh tih an sawi.

Hrem an nih avangin Russia leh Belarus hian World Athletics Championship leh World Athletics Indoor Championship-ah infiammi an tir thei lova, Thitin thlaa neih tur World Athletics Series Events-ah pawh an tel thei dawn lo a ni.