Professional Game Match Officials Limited (PGMOL)-a an hotupa Howard Webb chuan Wolves leh Manchester United inkhelh tum khan, Wolves chuan penalty hlawhchhuak tur an nih thu a sawi.

August thla ni 15 khan Premier League inkhelah Manchester United chuan Wolves an mikhual a, Old Trafford-ah hian United hi si khat faiin an chak a, goal awmchhun hi Raphael Varane-a’n 76mins-a a thun a ni.

Hemi tum hian Wolves hi an khel chhe lo hle a, United ai hian an khel tha zawk tih theih a ni a, mahse an si phur an sut thei lo. Hun tawp lamah United box chhungah ball vawrh luh a ni a, United si ban nghaktu Andre Onana chuan ball hnek thelhin Wolves player Sasa Kalajdzic a su thlu a, Wolves lamin penalty hmuh inbeisei viau mah se inkhel viltu referee Simon Hooper chuan a pe lova, VAR lama thu Michael Salisbury pawhin Hooper-a thlutlukna a sawisel lo.

Howard Webb chuan Onana-a’n Kalajdzic a sut thluk dan chu foul a nih thu sawiin penalty tur a nih thu a sawi a, tun season-ah referee ten tihsual a ngah ta malh malh hle a ni.

Webb chuan Manchester City in 5-1 a Fulham an sawp tum pawh khan, City goal hnihna chu offside tur a nih thu a sawi bawk a, Newcastle laka Liverpool defender Virgil van Dijk hnawhchhuah chungchang erawh thutlukna dik a nih thu a sawi thung a ni.