Premier League inkhel pawimawh takah Manchester United chuan kaithar Wolves an tlawh a, team lian ngam tak Wolves lakah United hi 2-1 in an tlawm.
Wolves tan Diogo Jota chuan goal a khung bakah United defender Chris Smalling chu a own-goal palh bawk. United tan Scottish player naupang Scott McTominay chuan goal a khung a, Ashley Young chu hnawhchhuah a ni bawk.
United hian khelh 32-ah point 61 hlawhchhuak tawhin panganaah an awm mek a, an hnuai chiaha awm Chelsea leh an chunga awm Tottenham leh Arsenal-te aiin khelh khatin an khel tam zawk vek. Wolves hian khelh 32-ah point 47 nei tawhin tunah hian 7-naah an awm mek.
Wolves hi kaithar ni mahse Premier League team lian ho point chhuhsak an ching hle a, team lian laka point an hlawhchhuah theih em avangin chanchinbu mite chuan ‘giant killer’ an lo ti hial. Kaithar chauh ni mahse Wolves hi pasarihnaah an awm thei a, tun season kal mekah Premier League team lian paruk-te chiah an pha lo mek a ni.
Wolves 2-1 Manchester United
(Jota 25’, Smalling 77’ OG) (McTominay 13’)
Red Card : Young (Man Utd)
PLAYER RATINGS
Wolves: Patricio 7, Bennett 7, Coady 7, Boly 6, Doherty 6, Dendoncker 8, Neves 8, Moutinho7, Vinagre 7, Jota 8, Jimenez 9. Subs: Saiss N/A, Jonny 7, Cavaleiro 6.
Man Utd: De Gea 7, Young 4, Lindelof 5, Smalling 6, Shaw 6, McTominay 7, Fred 5, Pogba 4, Dalot 6, Lukaku 5, Lingard 4. Subs: Martial 5, Jones 4.
Match Report
United manager thar Ole Gunnar Solskjaer chuan a naute chu 3-5-1-1 formation-in a rem a, David De Gea chu si ban nghah tir niin, defence pathumah Young, Smalling leh Victor Lindelof-te an intlar. Wingback-ah Diogo Dalot leh Luke Shaw-te awmin, midfield-ah Paul Pogba, Fred leh McTominay-te an awm bawka, hmatawngah Romelu Lukaku maltlat tir niin a hnung chiahah Jesse Lingard dah a ni.
Wolves hian 3-5-2 formation an hmang ve thunga, Portuguese keeper Rui Patricio chuan si ban nghakin defence-ah Bennett, Coady leh Boly-te dah an ni a, wingback-ah Vinagre leh Doherty-te an awm bawk. Midfield-ah Belgian midfielder Dendoncker, Ruben Neves leh Joao Moutinho-te intlarin, hmatawngah Jota leh Raul Jimenez-te inkawp tir an ni bawk.
Inkhel tan a ni a, minute sawm chuang hret khelh a nihin United lamin hma an hruai nghala, tum dang ang bawkin hnehna chang leh turah an inngai hle; McTominay chuan Fred chu ball pe in 25 yards vel atangin kum 22 McTominay chuan mawi takin Wolves goal botton corner-ah a khung.
United-in goal an khung atanga minute sawm vel khelh a nihin mual neitu lam Wolves chuan an si phurh an sut a, De Gea chuan Fred chu ball a pe a, Fred hi ball hlohvin Jimenez chuan Jota chu through ball tha tak pe in, Jota hian ‘cool’ takin a finish a, 1-1 a ni.
Darkar chanve vel khelh a nihin United goal hnaihah Dendoncker chu ball a changa, mahse duh anga pet fuh thei lovin ball chuan goal a thlawh khum. Wolves hmatawng lam an hnawk hle a, United wingback pahnih Shaw leh Dalot pawh an rimin an buai hle a, first half tawp hma in yellow card an hmu ve ve.
43mins-ah Wolves hian freekick an hmu a, Moutinho chuan freekick atang hian United box chhungah ball a vawrh lut, ball hi United lamin clear mahse Neves chuan a lo changa, Neves hian yard 25 vel atanga petin tlema lo khawih per a ni a, mahse De Gea-a tan thil harsa a awm lo.
Half time hma deuh lawkin Wolves box pawnah Pogba leh Lukaku-te chuan ball an inpe a, Lukaku chuan a ke dinglamin Wolves goal-ah ball hi chhuih mahse goal a zawn lova, first half hi 1-1 in a tawp.
Second half tan a ni a, yard 30 vela hlaah Fred chuan ball changin Wolves lamin an chilh lawk loh avangin Brazilian midfielder hian Wolves goal-ah ball a chhuiha, mahse goal a zawn lo. 52mins-ah Young chu Jota laka a foul avangin yellow card pek a ni.
Young-a’n yellow card a hmuh hnu lawk hian McToninay chuan a ball hmu tha tak mai chu Wolves goal lamah a lo tauha, mahse veteran keeper Patricio chuan tha zetin a lo save. Hemi hnu lawk hian Young chuan Jota a kherhthlu a, referee Mike Dean chuan Young hi yellow card pa lehin United captain hi hnawhchhuah a ni a, 57mins vel atangin United hi player sawma an khelh a ngaih phah.
Solskjaer chuan an defence pawp lutuk tur ven nan Fred a la chhuaka, 65min-ah Phil Jones a dah lut. Minute sawmsarih vel khelh a nihin Dalot chuan Jota chu United box chhungah ti tlu in Wolves lamin penalty hmuh an inbeisei a,mahse referee Dean chu penalty pekna tlakah a ngai lo thung.
77-mins-ah Moutinho chuan ball a cross a, Jimenez chuan ball hi a lu in ball hi a lo tawk ve leh a, Dendoncker chu United box chhungah hnawk hle in, buaina karah ball chu goal-ah a luta, Smalling-a tih luh palh niin Wolves hian 2-1 in hma an hruai ta.
Hun tawp hma deuh lawkin De Gea a chuan save tha tak a nei a, Wolves hian cross bar an pet per bawka, hmahruaitu zawk ni mahse Wolves an hlauhawm tluana, intum tawkin statistics atanga en chuan United hi hlauhawm zawk angin lang mahse Wolves hi an hlauhawm zawk a tih theih. Goal lut awm tawh lovin inkhel hi 2-1 a tihtawp a ni a, United chuan pathumnaa chhoh theihna hun tha an neih an bawlhpelh a ni.
