Premier League club Wolves chuan French club Lyon atangin kum 31 mi Brazilian defender Fernando Marcal an lei fela, kum hnih daih contract an ziahpui.

Wolves manager Nuno Espirito Santo chuan Europa League atanga an tlak hnu khan squad chhah zawk a mamawh thu a sawia, hemi hnu hian Wolves chuan player pahnih an lei tawh.

Marcal hi sawilan angin tun nipui bazara Wolves player lei thar pahnihna a ni a, Wolves hian kar hmasa mai khan an club chanchina player man to ber ni turin Fabio Silva chu Porto FC atangin an lo lalut tawh bawk.

5ft 10’-a sang Marcal hi left-back leh centre-back ah a khel thei ve ve a, Champions League khelh zawh takah khan Lyon-in Manchester City quarter-final an pet thlak tum pawh khan a khel tha hle nghe nghe.

Marcal hian kum 2017 khan Lyon hi a zawma, Lyon tan hian game 68 a khel tawha, Brazilian club Gremio academy chhuak niin, Gremio hi Ronaldinho lo chawr chhuahna kha a ni.

Wolves chairman Jeff Shi chuan an no.5 thar chungchang hi sawiin, “Marcal-a’n min rawn zawm hi kan lawm hle a, top league hrang hrangah game 280 chuang a khel tawha, Champions League football a hmelhriat bawka, Marcal hian kan team naupang takah hian experience a rawn keng lut ngei dawn a ni,” a ti.

Marcal hi Gremio academy chhuak ni mahse, Gremio tan hian a inlan hman lova, kum 2015 atang khan Europe lamah khelin, Benfica a zawm. Gaziantepspor leh Guingamp lamah loan-a a chhuah hnuah Lyon hi zawmin, Lyon tlarhnung innghahna ber a ni chho a, Wolves tan pawh a tangkai hle a rinawm a ni.