Wolves chuan Football Association hnenah, Liverpool nena an inhmachhawn tuma Toti Gomes-a goal an pawm loh chhan kha sawifiah turin thu an thlen niin Julen Lopetegui chuan a sawi.

FA Cup match-ah Liverpool nen 2-2 in Anfield-ah an inhnehtawk mek, hun tawp dawn lamah Toti chuan goal a khung. Chutih laiin Matheus Nunes kha offside niin assistant referee khan a lo phar.

VAR hmanga ennawn tur video duhthusam a awm thei bawk si lo, Julen Lopetegui chuan, "Internet lamah ka lo hmu a, ngaihdan chiang tak ka nei nghal. FA hnenah khami chungchang kha sawifiah turin thu kan thlen a, an chhanna kan nghak mek e," tiin a sawi.

Mohamed Salah-a goal khung dan pawh kha offside niin a lang a, build-up ah khan Salah kha a lo pawng ngei tih inkhel en chuan kan hmu vek awm e. Chutih laiin referee Andrew Madley khan VAR rawn loin goal-ah a pawm nghal bawk.

Inkhelh zawhah Lopetegui leh captain Ruben Neves te chuan Andrew Madley an hmu a, "Liverpool-in offside an nei ve thei lo a ni, kha thil kha chu a zia lo hle mai. Ka naute hian next round luh an phu asin," tiin Lopetegui chuan referee a ankhum nghal.

The Wolves Trust, a supporters' group pawhin FA emaw, referees' body Professional Game Match Officials Limited (PGMOL) emaw hnen atangin ngaihdam dilna an phut thu an tarlang nghe nghe bawk a ni.

Wolves leh Liverpool te kha 2-2 in an inhnehtawk a, January ni 17-ah replay match Wolves home-ah khelh a ni ang.