Kumin Wimbledon chu khelh zawh a lo ni leh ta a, Men’s Singles final-ah world number one ni lai Carlos Alcaraz chuan champion lai Novak Djokovic hnehin, Alcaraz hi ropui takin a champion a, world number one a ni chhunzawm zel dawn.

Spanish player Alcaraz hian Djokovic hi 1-6, 7-6 (8-6), 6-1, 3-6, 6-4 in a hneh a, a vawi khat nan Wimbledon-ah champion in, hei hi a Grand Slam title pahnihna a ni.

Alcaraz chuan, “Ka suangtuahna a taka rawn thleng a ni a, chak lo zawkah tang ta pawh ni ila ka inchhuang em em dawn a, hetiang stage sangah kum 20 mi lek nia ka inkhel thei hi thil a kal chak hle a, ka inchhuang takzet zet a ni,” tiin a sawi.

Alcaraz leh Djokovic te hi an kum a inthlau hle a, Alcaraz hi kum 20 a ni a, Djokovic hi kum 36 niin, Wimbledon final-a intumah kum inthlau ber pathumna an ni a, Alcaraz a pian hian Djokovic hi professional tennis player a ni tawh.

Grand Slam final vawi thum a khelh tawhah Alcaraz hi vawi hnih a chak tawh a, nikum khan US Open-ah lo champion tawhin, kuminah a champion leh a, hmalam hun nei eng ber tih theih a ni.

Kum 20 chhung teh meuh Wimbledon-ah hian Roger Federer, Rafael Nadal, Djokovic leh Andy Murray te an in champion chhawk tawh a, Alcaraz hi kum 20 hnuah heng player pali te nilo Wimbledon-a champion leh thei hmasa ber a ni.

Djokovic hian tun hnaiah Wimbledon-ah ro a rel a ni ber a, Alcaraz a hneh loh hma hian Wimbledon centre court-ah kum 10 chhung zet chak loh a nei tawh lova, a zawnin vawi 4 a champion mek bawk a, mahse Alcaraz-a lakah chak lo zawkah a tang ta a ni.

Djokovic hian Grand Slam title 23 la tawhin, ani aia Grand Slam title kawl hnem hi Men’s Singles huangah an awm lova, Wimbledon-ah hian vawi 7 champion tawhin, Wimbledon-a champion hnem ber Federer-a record a nihrual thei ta rih lo a ni.