Naomi Osaka chuan French Open a mangṭha hnuin Wimbledon a khel lo maithei tih a sawi.

Grand Slam-a vawi li champion tawh hian French Open (Roland Garros an tih bawkah) first round a paltlang zo lova, Amanda Anisimova lakah tlawmin a tla hma hle.

A chakloh hnuin kum 20 mi hian grass season khelhloh mai a rilruk tih a sawi a, Wimbledon pawh a ngai pawimawh teh chiam lo.

Wimbledon-ah hian Russia leh Belarus player-te an tel theih dawn loh avangin ranking point hmuh belh theih a ni dawn lova, player-te hian champion bakah an point hmu tur hre ranin intihsiakna hi an khel ve ṭhin.

Osaka chuan, "Point a awm dawn loh avangin grass court rah loh maite ka rilruah a awm a. Wimbledon ka khel ngei dawn em tih hi za-a-za in ka chiang lo.

"Grass court-a tawnhriat neih belh tur chuan tel ka duh a, point a awm dawn loh avangin awmzia a nei lo pawh ka ti chuang lo. Amaherawhchu rank san zel duh vanga inkhel ka ni.

"Ka rilrua Wimbledon a tlaknat loh chhan hi ka hre bik lo. Point a awm dawn loh avangin inpholanna satliah ang chauh niin ka ngai.

"Ka ngaihdan hi a dik lo tih hre mah ila ka rilrua a lan dan a ni ve tlat si a. Ka ngaihhlut loh thilah chuan ka insawrbing thei lo." tiin a sawi.

World No 38 hian mimal thil avangin nikum khan hun engemaw chen chawlh a la a, Wimbeldon-ah hian third round aia sang ala thleng ngai lo bawk a ni.