Portugal captain Cristiano Ronaldo chuan 2022 Qatar World Cup Final-a Lionel Messi hmachhawn chu a duhthusam a nih thu Piers Morgan nen an inkawmnaah a sawi chhuak.
Portugal team hi Group H-ah awmin Ghana an hmachhawn hmasa ber ang a, Uruguay leh South Korea te nen group khatah awmin knock out stage luh an tum dawn a ni.
Kum 35 Lionel Messi-a team Argentina hi team tha leh champion rinkai an ni ve mek bawk a, anni hi Group C-ah awmin Saudi Arabia, Mexico leh Poland te nen an awm ho.
Messi leh Ronaldo te hi football player zinga fans ngah fal pahnih an ni, World Cup final-ah inhmachhawn se titu an tam em em, Ronaldo ngei pawhin final-a Messi hmachhawn chu a duhthusam a nih thu a sawi chhuak.
"Final-a Messi hmachhawn chu kei pawhin ka duhthusam a ni alawm. Messi hi player ropui tak a ni, a thiam dan hi a danglam fal nalh bawk. Kum 16 chhung hun duhthusam kan lo hmang tawh a.
"Ani nen hian kan inkar a tha em em, nitina kan ina rawn leng lut ka thian te zingah chuan a tel bik lo, phone pawhin kan inbe reng bik lo. Mahse ka team-mate ang maia ka ngaih a ni.
"Ka zah em em a, ani pawhin ka chungchang a sawi chhuah dan hi ka ngaina bawk. Messi chungchang ka sawi dawn a nih chuan, Football tana thil ropui thlentu tiin ka sawi thin," tiin Cristiano Ronaldo chuan a sawi.
Lionel Messi hian Ballon d'Or vawi 7 a dawng tawh a, Cristiano Ronaldo hian ballon d'Or vawi 5 a dawng tawh. La Liga-ah an han khel dun phei kha chu an hmuhnawm a, an ngaihnawm a, fans lam leh media lamin kan han khaikhin bawk nen, vawiin thlengin khawvela footballer tha ber inhnialnaah chuan; khawvel mipui hi anni pahnih hian hmun hniah min then phawk kan ti thei awm e.
Messi hi kum 35 a ni ve tawh a, Ronaldo pawh kum 37 a ni tawh bawk. Kumin World Cup hi World Cup an khelh hnuhnung ber tur a ni dawn ta niin a lang a. Football hi an chawlhsan tep tawh tih chu a chiang tawh a ni.
Hetih lai hian Morgan nena an inkawmnaah Ronaldo chuan, "Kum hnih emaw chhung chu inkhelh ka la duh, kum 3 pawh ka la inkhelh theih ka ring. Kum hnih emaw kum thum emaw chhung chu ka la inbeisei a ni.
"Kum 40 ka nihin football chawlhsan ka tum a, hetih lai hian ka hre lo le, ka sawi lawk thei lo hma hun hi chu.
"A chang hi chuan kan hun hman dan tur te hi kan han duang lawk ve thin a, tu man kan hma hun kan hre lawk si lo," tiin a sawi bawk.
Nipui bazar inhawn lai khan Manchester United chhuahsan tumin hma a la a nih kha, khatih lai khan Saudi Arabia club-in footballer hlawh hnem ber ni turin an sawm, mahse Ronaldo chuan kha kha a hnar.
Spanish chanchinbu Marca-in a tarlan danin Al-Hilal club-in kum hnih chhung atan Portugal captain hi £305m vel hlawh turin an sawm, hemi chungchang hi Morgan-a'n a zawh tumin Ronaldo chuan, "A dik alawm.
"A nihna takah chuan an sawmna hnar kha chu a har ve deuh chu a ni, chutih mek lai chuan ka duhthlannaah ka hlim em em tho. Tunah hian goal tam tak la khung thei niin ka inhria, goal khung bakah team tana tha thawh thei niin ka la inhria. Ram tan pawh hian tha la thawh thei niin ka la inhria a, Manchester United tan pawh theihna ka la nei.
"Hetih lai hian nangmah hual veltute lakah nuam i tih tawh loh erawh chuan a harsa ve ta thin thung a ni. Sawiselna hi chu engtik lai pawhin a awm reng dawn, 'Kum 37 a ni tawh, a hma a phak tawh lo,' te min ti thin bawk.
"World Cup ka khel leh thei tur hi ka lawm em em, rilru leh taksa lamah ka inbuatsaih tha hle. Khelhna club hmu zo lo ang tein chanchinbu lamin min lo chhuah ve bawk chungchangah chuan, Season tha tak ka hmang. Tuman Ronaldo an duh lo tih an chhuah kha chu a dik lo, nikum khan ram leh club tan goal 32 lai ka la khung thei alawm, hetiang ti thei hi an hnawl ngawt thei bik lo a ni," tiin a sawi.