Fiorentina chuan Juventus hnena Serbian striker Dusan Vlahovic an hralh hnu lawkah FC Basel atangin Brazilian striker Arthur Cabral an lalut ve leh nghal.

Tunkar khan Juventus chuan Fiorentina atang hian kum 22 mi Vlahovic an lei a, a manah hian euro maktaduai 70 vel lai an seng a, kum li leh a chanve daih contact an ziahpui.

Fiorentina-in an hralh tak Vlahovic hian season kal mekah Serie A game 21 khel tawhin goal 17 a khung tawh a, Lazio striker Ciro Immobile nen an goal khung zat inangin, an pahnih hian tun season-a Serie A goal khung hnem ber an ni.

Vlahovic a chhuah takah chuan Fiorentina hian striker an dap ve nghal a, Juventus nen indawr lai atang khan kum 23 mi Cabral hi an dawr tan tawh a, a man hi puanzar ni lo mahse Swiss chanchinbu te chuan euro maktaduai 16.5 vel niin an tarlang.

Kum 2019 August thla khan Cabral hian Brazilian club Palmeiras atangin Swiss club Basel hi loan-in a zawm a, a hnuah Basel hian an lei zui. Basel tan Cabral hian game 106 khel hmanin, goal 65 a khung hman a, assist 17 a nei hman bawk.

2021 Swiss Super League's Player of the Year Cabral hian season kal mekah Basel tan game 31 khel hmanin, goal 27 ngawt a khung bakah assist 8 lai a nei hman bawk a ni.