Real Madrid player Vinicius junior chuan Pathiannia Real Mallorca an hneh loh tumin chi inthliarna lam rawngkaia auh nawmnah a tawk leh a, La Liga lam chuan an chhui chiang dawn.

Social media footage pakhat chuan Vinicius auh nawmnah a nih lai hi a la fuh a, chi inthliarna hi tun season-ah a lo tawng fo tawh.

Vinicius hian tun season-a Atletico Madrid an hmachhawn hma leh an hmachhawn laiin auh nawmnah a lo tawk tawh bawk.

"RCD Mallorca vs Real Madrid match-ah Real Madrid player Vinicus Junior chuan chi inthliarna lam rawngkaia chhaih nawmnah a tawk leh a, La Liga chuan kan ngawih bopui mai mai dawn lo. A tul anga mawhphurtu chunga hma lak a nih theih nan local club nen kan thawk ho mek.

"La Liga chuan hetiang thil thleng hi kan dodal a, a thleng chhunzawm a nih chuan complaint kan theh lut zel ang. La Liga chuan hetiang chetdan mawi lo hi kum tam kan lo dodal tawh a, infiamna huang chhungah hian boruak tha chiah kan duh,"tiin LaLiga chuan an thuchhuahah an tarlang.

Thil thleng chungchang hrilh hre thei an awm a nih chuan email hmanga be pawp turin League chuan supporter-te an ngen bawk.

December khan Vinicius chuan social media-ah LaLiga chu engmah ti loah a puh a, he puhna hi League president Javier Tebas chuan a chhang let nghe nghe.

Tebas chuan Vinicius-a puhna chu a dik loh thu sawiin, "Racism hi kum tam tak chhung ka lo do dal tawh, i lamah kan tang a, a rualin ke kan pen ang,"tiin twitter-ah a tweet a ni.

Thla hmasa Copa del Rey-a Real Madrid-in Atletico an hneh tumin, social media thlalak pakhatah Spanish capital Bridge-a Vinicius-a kawr ha mannequin a nghawnga inkhai chu hmuh a ni a. Hei pawh hi club chuan chi inthliarna leh inhuatna tihlanna niin an ngai.