La Liga president Javier Tebas chuan a thil tweet chungchangah Vinicius Junior hnenah ngaihdam a dil a, beih a tumna lam a nih loh thu sawiin, racism titawp tura theihtawp a chhuah tur thu a sawi.
Vinicius chuan Valencia an hmachhawn tumin chi inthliarna lam rawngkaia beih a tawk a, a lungawi lohna thu chhak chhuak nghalin, La Liga chu racist ho ta a nih tawh thu a post nghal. A post hi Tebas chuan a chhang let a, thil thleng chungchang sawi pui tura an koh tuma a inlan loh avangin a chhuahchhal let.
Vinicius chuan a chhang let ve leh a, "Nangmah leh nangmah insawi fihlim i tum khan racist-te tluk chiahah i indah. Racism chungchang i sawipui tur i thian ka ni lo," tiin a chhang let ve hmak.
Tebas zawk chu a nem hmasa zawkah a tang a, amah leh amah insawifiahna atan inhmangin tuifawn chu bengdaih a tum.
"Kan thu chah duhte an hrethiam ngei em? tih hi a pawimawh a, chu chu ka hnathawkte bulah pawh ka sawi fo thin. Ka thusawite lak kawih palh a awm avangin ngaihdam ka dil a ngai.
"Ka thil ziah kha ka tum loh lam zawnga lak kawih a ni a, a pawimawh lai ber kha inhrethiam lo a ni, chuvang chuan pawi ka ti khawp mai, a bikin Brazil mipuite chungah ngaihdam ka dil.
"Vinicius-a beihna lam zawnga ka ziah a ni lo a, racism titawp tura hma lakpui tura ka sawm tumna mai a ni,"tiin Tebas chuan a sawi.
Rayo Vallecano an hmachhawn dawnin, Real Madrid player-te chuan Vinicius an support zia tihlan nan Vinicius-a kawr No. 20 an ha. Spanish Football Federation chuan Valencia chu pawisa €45,000 an chawitir a, game 5 chhung atan stadium an khar tir bawk.