90s hnu lamah Mizoramin TV leh technology thar kan tawng chho, TV kan en hnuah video game a rawn chhuak chho bawk a. Brick games kan tih mai Nintendo Gameboy chu kum 2000 hma lama Mizo naupangte khelh hnem tak a ni. 8 bit game a rawn chhuak chho, Mario Bros. te leh Contra te chu game khelh nuam tak an ni. Chutah 16 bit Sega game a rawn chhuak, Sony an rawn zuang lut ve bawk, PlayStation 32 bit an rawn siam chhuak, hralh a va kal tak em!
Kum 2000 hnu lamah Computer chu mimalin kan nei chho tan ta bawk a, Console game-a kan khelh thin tam tak kha PC hmangin a rawn khelh chhoh theih ta bawk a. PlayStation 2, 3 leh 4 thlengin Console game a rawn chhuak, Microsoft lam pawhin Xbox an rawn siam bawk a, anni pawh an chetha kher mai. Vawiinah zet chuan Hollywood-in kum khat chhunga an hlawkna let thawk Gaming industry hian sum an lalut ta hem mai.
Kum 2010 hnu lamah smart phone kan hmelhriat chho ve ta, kim tinin a rawn changkang chho zel a, kum 1969-a America-in thla lawn nana an khawl thluak (Processor) aia chak daih kan kutah kan hum reng tawh a nih hi. Mobile hmanga khelh tur game tha tak tak kum tin a rawn chhuak ta zel a, phone nei tawh phawt chuan game engemaw tal kan khel vek ti ila kan sawi sual lovang. Game khelh nuam ti pawl chu thalaite hi kan ni zel dawn a, game hian mihringah nghawng tha leh nghawng chhia a neih dan tarlang teh ang.
A taka kan hmuh loh leh kan la khawih ngai lohte pawh game kan khelh atangin kan hre hneh em em thei. Kumin kumtir lama sap media lian ten an tarlan danin, first person shooter game Call of Duty khel thin John Duttenhofer chu sipai training nei miah lovin Syria-ah ISIS kapin a fehchhuak. A game khelh thin avangin silai chinchang a hre hneh hle a, ral kah dan leh tactic chihrang hrang chu zir ngai lovin a hmunah a hmang thei nghal. He sipai hi him dam takin an ramah a kir leh nghe nghe a ni.
PC game Age of Empire te phei kha chu history hriat nan a tangkai em em. Lehkha kan zir laiin History hi har kan ti em em thin, French revolution te ngat phei kha chu hriat vek a har lutuk, mahse Ubisoft game Assassin's Creed : French Revolution kan khelh hnu kha chuan an kawtthler zawng zawng, an hotu lu zawng zawng leh kum pawimawh zawng zawng thlengin kan sawi vek thei tawh.
CD Projekt Red siam The Witcher game te kha Europe ram history hriat nan a va pawimawh tak em! Atari production niin Polish author Andrzej Sapkowski-a novel ziah zulzuia siam a ni a, Mediaval hunlaia Poland ram chanchin chu hriat a awl khawp mai. Gamer te hi reasoning-ah an tha tlangpui bawk a, chu chuan nitin nunah leh exam chi hrang hrangah a tha zawngin nasa takin thalaite a pui thei nghe nghe. Game khelh hian hriatna a tizau a, mi tam takin tangkaiah an hman laiin thalai tam tak nun tichhetu erawh a ni mek a nih hi. Valve Corporation siam Dota phei chu tunlaia E Sports game lar ber pakhat a ni a, mi tam takin millionaire nih nan an hmang, Asia ram changkangah phei chuan eizawnna tling a ni, chutih laiin keini Mizorama awm, internet chak em em lohna atang hi chuan kawng a la ping hle, chuvang chuan eizawnna atana hman tlak a la ni lo.
Gaming hi Mizoram mai ni lo, khawvel hmun tam takah thalai ten an chhiatpui mek bawk a, thenkhat phei chuan an thihpui hial bawk. Thalai tam tak game an khelh nasat avangin chaw mumal ei nachang an hre lo thin, an meng rei a, an mu tlem em em bawk, an taksa a lo chak lova, thih thut thutna hei hian a thlen thin bawk. Hei hi World Health Organisation chuan a hrechiang em em, kumin kum tir khan WHO chuan game khelh nasat hi damlohna chikhatah a puang ta hial a ni.
Tin, mit hi a uiawm em em bawk, tunlaiah mobile game tha tak tak, Mobile Legend, PlayerUnknown's Battlegrounds (PUBG), Mini Militia, Clash of clans, etc. a rawn chhuak, mobile game te phei chuan mit a heh em em, kan hausa a, mit thlak zung zungna tur sum kan nei a nih chuan i mit kha hmang bawrh bawrh rawh, mahse chutianga hausa kan ni lo a nih chuan i upat hun atan i mit kha khek ve deuh teh khai.
Hna hah takin kan thawk, zanah mut hahchawlh kan duh, chutih laiin kawtthlerah an bengchhen reng chuan thin hi a rim tur zel. Zanlaia thian hova mobile game khelh ho te hi a nuam lutuk, chutih laiin midang hahchawl turte tana bengchheng kan siam sak a nih erawh chuan thil tha lo tak a ni. Veng dangah phei chuan zana kawt vela game khelhho hi an khap tawh hial. Thalai kan ni a, kan thatlai chen turin Bible pawhin min phal chiang mai, chutih laiin nakin huna kan nun kal zel tur erawh dawn turin min ti.
Game khel suh kan inti thei lo, tu pawh, nu leh pa thlengin mobile game engemaw tal chu kan khel vek ang, mahse kan nakin hun tihchhiat nan heng game hi hmang lovang u khai. Mi ramah chuan eizawnna tlak a ni, kan ramah chuan a ni ve lo, hunawl leh hahdam paha khelh vel hi a tawk rih viau mai. Game kan khel tur a ni, mahse kan lehkha zir tibuai khawp emaw hnathawh tibuai khawp emaw chuan kan khel tur a ni lo.
I nu leh pa an hausa a, i tu chhuan thum vel thlengin an hausakna in chen thei dawn a nih chuan lehkha zir vak pawh ngai i ti hran lovang. Chutiang kan nih si loh chuan, nakin lawka chhungkaw chawm tur kan ni tih inhre reng ila, kan hun hlu tak hi game khel mai maiin i khawhralin; i tichhe lovang u khai. Chhungkaw dangin MCS, Doctor leh Engineer chhuak thar thalai an neih suau suau laia in chhungkaw thalai ten, "Enemy ka that hnem ber, ka score sang ber," kan lo la tih laih laih chuan in hmabak hi a ropui vak dawn lo a ni. Mi game siam khela lo inlak ropui vak ai chuan midang game khelh tur siamtu nih tum zawk te hi a va tha dawn tak em! A tawp berah chuan, Game chu khelh tur a ni, mahse chintawk i hria ang u.