Barcelona chuan Bayern Munich atangin midfielder Arturo Vidal an lalut dawn a, Sevilla chuan Barcelona atang hian an player hlui Aleix Vidal an la let ve thung dawn a ni.

Aleix Vidal hian kum 2015 khan Barcelona hi Sevilla atangin a zawma, Sevilla bawk hian an lei let dawn a, right-back Vidal-a man hi euro maktaduai 8.5 niin euro maktaduai 10.5-ah a la chho thei dawn.

Aleix-a’n Barca a zawm tirh hian Dani Alves a nek chhuak zo lova, Alves a chhuah hnu pawh hian Sergi Roberto chuan hmun lailum chang zawkin, Aleix hian inkhel bul a tan khat hle.

Sevilla-ah hian kum 28 mi Aleix hian kum li daih contract a ziak dawn a, tun bazar-a a ngheta Sevilla player lakluh thar parukna a ni ang.

Season thum a cham chhungin Aleix hian Barca tan game 49 khelin goall li a khunga, trophy pariat a chawi hman.

Barcelona hian nimin lam khan midfielder Arturo Vidal-a chungchangah Bayern Munich nen inremna an neih thu an lo puang tawh bawka, Vidal hian kum thum daih contract ziak dawnin, medical neih chiah a hmabak tawh. Kum 31 mi Vidal-a man hi tarlan a ni lo.