Formula 1 world champion vawi hnih lo ni tawh, tuna Alpine F1 driver ni mek Fernando Alonso chuan F1 season kal mekah Red Bull driver Max Verstappen chu champion tura a rin ber thu a sawi.

Season kal mekah Vertsappen hi vawi li a chak tawha, race hnuhnung pahnihah chak ve ve bawkin, season hmasa champion Lewis Hamilton-a lakah Dutch driver hian point 18-in tunah hian hma a hruai mek.

Season dang angin Mercedes an che lutuk thei rih lova, race pariat tlan tawhah Hamilton vawi thum a chak tawha, sawi tawh angin kum 23 mi Verstappen hi vawi li chak tawhin, pakhatah Red Bull driver dang, Verstappen-a team mate Sergio Perez a chak ve bawka, Mercedes leh Red Bull te an inum mek zel.

Alonso chuan tun season-a champion tura a rin ber chungchang zawhna chhangin, “Tunah hi chuan Max hi a tlan dan enin champion tura rinkai ber a niin ka hria. Thil hi a danglam thut thei renga, team tinte chet dan leh car an update dan hian kawngro a su leh hle dawn a ni,” a ti.

Tun Sunday lo awm turah hian Austrian Grand Prix tlan a ni dawna, driver leh team-te inbuatsaih mekin, Hamilton leh Verstappen te bawk chu Austrian GP-ah hian chak tura rinkai ber an ni leh mek a ni.