Leny Yoro chuan a khelh chakna Real Madrid hawisanin, Manchester United a pan a, kum 18 mi manah hian United chuan £52million ($65m; €62m) an seng a, a man hi £59m thlengin a sang thei dawn a ni.

Yoro hian Real Madrid pan a chak em em laiin, United a pan tak daih dan hian titi a ti tam hle a, he defender kum 18 mi hian Old Trafford-ah kum 5 daih contract a ziak ta zawk a ni.

Real Madrid chuan Yoro manah hian €25million atanga €30million vel chauh an thehchhuak. Lille-a a contract hi June 2025-ah a tawp tawh dawn. French club hian free transfer-a chhuahtir an tum lo a, tun nipui bazar inhawn lai ngeia man to taka chhuahtir an tum.

Real Madrid hian man to takin an ngam lo, Rudiger, Alaba leh Mbappe te an tih ang a, a contract zawh hun nghah an tum leh nia report a ni. Hei hi Lille chuan an duh lo a, an academy chhuak hi man to taka hralh hrim hrim an tum em em a ni tawp mai.

Manchester United lam lahin Real Madrid ngamna let thawkin an rawn ngam si, Lille chuan Manchester United lama kaltir chu an tum ruh ta hle niin The Athletic chuan a tarlang a ni.

Thawhlehni khan Manchester United leh Yoro te chuan inremna chu an nei tawh, mahse Yoro hian Real Madrid a la ngaichang a, Los Blancos lam an reh tak siah chuan, Nilaini khan UK lam a pan ta nge nge niin The Athletic chuan a tarlang.

Tin, Lille chuan Yoro hi an nawr na hle niin The Atheltic chuan a tarlang a, man to taka amah duhtu lam a pan loh chuan season thar chu inkhelh tir loh thleng pawhin an vau niin French media thenkhat chuan an tarlang bawk.

Yoro chuan UK panin, Carrington-ah medical a nei a, Ningani zan khan contract te ziakin, Manchester United chuan an player thar a nih thu an puang ta nge nge a ni.