Liverpool manager Jurgen Klopp chuan kuminah an defender Virgil Van Dijk chuan Ballon d’Or dawn a phu ber tih thu a sawia, mahse tunlai footballer-ah Lionel Messi chu tha a ti ber niin a sawi tel thung.

October thla khan 2019 Ballon d’Or chawimawina dawng thei tur mi 30 hming tarlan a ni tawha, an zingah hian Van Dijk leh Messi hi tel ve ve in, Liverpool player dang Sadio Mane, Mohamed Salah, Georginio Wijnaldum leh Roberto Firmino-te hming pawh lang mahse Klopp chuan Van Dijk hian kuminah chuan Van Dijk hian a phu berin a ngai.

Klopp chuan, “Tunlai footballer thiam ber hnenah Ballon d’Or hi pek tur nise Lionel Messi hi pek ngei tur a ni. Mahse season hmasaa player tha ber hnenah Ballon d’Or hi kan pe dawn a nih chuan season hmasaa player tha ber chu Virgil Van Dijk a ni.

“Ballon d’Or kalhmang hi ka hre chiah lova, football chanchina player tha ber chu Lionel a ni mahse season liamtaa tha ber chu Virgil a ni thung a ni,” a ti.

Klopp chuan Premier League-a champion tura an inrin leh inrin loh chungchang zawhna chhangin, “Tiang lam hi kan ngaihven lutuk hran lova, Leicester aiin point 8-in kan sang mai chauh a la ni a, anni hi ngaihthah ngawt chi an ni lo; kum thum emaw kum li emaw lianta khan an champion a, Chelsea pawh hian season tha tak an hmang mek bawk.

“Kan game hnunhnung berah khan Crystal Palace kan hneha, khatah khan chak lo vaih ila chuan point 5 bakin kan fal dawn lo tihna a ni a, mi te thil thlir dan pawh a dang nghal vek thei. Point inthlauh dan te kan fal dan te hi kan ngaituah ngai lem lova, kan game khelh leh tur bak hi kan ngaihtuah lo a ni,” a ti.