USA-in England hneh an inring

23rd November 2022, 01:11PM

United States chuan kumin World Cup a an game hmasa berah 1-1 in Wales an inhnehtawkpui. 
An result hlawhchhuah hi duhthusam ni lo mah se, hei hian chhete mahin an inrintawkna a sawi nghing lo niin Pulisic chuan a sawi.

Chelsea attacking midfielder Christian Pulisic leh US captain Adam chuan ni 26-a England an hmachhawn turah hnehna an chan ngei an ring.

Pulisic pass tha tak zarah Timothy Weah chuan USA tan goal hmasa ber a khung a nih kha, second half-ah erawh Wales an rawn khel tha a, defender Walker Zimmerman chet chhiat zarah Wales ro hlu Gareth Bale chuan hun tha neiin penalty hmangin Wales siphurh a rul.

First half-a an game enin vawi 3 chiah shot mah se US hi chak tura rin an ni a. Chak theihna chance nei sang hle mah se Wales rawn er let leh an dang zo lo a ni ber mai.

An hmachhawn leh tur hi England an ni a, anni hian 6-2 laiin Iran an sawp. Chelsea player Pulisic chuan, "England team hneh tur hian kan tha thawkin ka hria, kan in enchhinna-a kan hmachhawn dawt leh tur an ni a, chak ngei turin dim miah lo a kan beih a ngai," tiin a sawi.

Captain Adam pawhin," Football-a chak leh chak loh inkar hi inches tlemte a ni, tihsual chhete pawhin dinhmun hniam takah mi dah thei. 

"Kan ruahmannate hlen theih ngei kan tum dawn. Wales nen kan inhmachhawn tum khan kan coach ruahmanna kan rintawk em em rualin lehlam pawl pawh an rawn tha ve em em a. A tawpah chuan hun tlemteah an rawn innghat ta a ni." tiin a sawi.

US Head coach Gregg Berhalter hian kum 1990 atangin World Cup-ah tawnhriat a lo nei tawh a, chu vang chuan an team-ah inrintawkna a awm thu Pulisic chuan a sawi tel bawk.

"Keimahniah inrintawkna a awm a, kan phur tlang vek. A lehpekah kan tawnhriat te kan rawn hmang tangkai tawh ang. Game-ah khan a tha zawnga thil thleng tam tak a awm a, chu chu minute 90 chhunga remkhawm dan kawng kan ngaihtuah a ngai.

"Frist game-a point 1 hmuh chu hmuh loh tawp ai chuan a tha tho tho. Kan bei zel a nga, kan tihsual atangin kan inzir zel ang. Chak ka duh a, ka team hi ka hmangaih lutuk. Kan ram tana theihtawp ka chhuah thei hi a ropui ka ti," tiin Pulisic chuan a sawi bawk.

England leh USA hi zirtawpni zan zanlaiah an inhmachhawn dawn, inkhel hmuhnawm tak a nih ngei a rinawm.

Copyright © inkhel.com 2022. All rights reserved.