USA national football team chuan, Arsenal striker Folarin Balogun chu an ram tana khel turin an duha, Balogun hi an be pawp tawh nghe nghe a ni.

USA hian tunah hian manager nghet an nei lova, Anthony Hudson chu interim manager atan an hmang meka, Hudson hian tun kar khan Florida-ah Balogun hi inbiakna a neihpui tih a sawi.

Balogun hi tunah hian French club Reims-ah a khel meka, USA-a piang ni mah se kum hnih mi a nihin a nu leh pa ten England-ah an pem puia, hemi avang hian USA leh England tan a khel thei ve ve a ni.

Kum 21 mi hi tun international break-ah hian England U21 tana khel tura koh a ni a, mahse a inhliam avangin a inhnukdawka, Florida-ah mimala training nei turin a zin a, hetah hian USA lam chuan an lo be ta niin a lang.

Balogun hi youth level-ah pawh England leh USA tan a khel kawp a, England U17,U18, U20 leh U21 tan te khel tawhin, USA U18 tan pawh game li khelin goal hnih a khung.

USA interim manager Hudson chuan Balogun an sawm chungchang sawiin, “A hma a ka sawi tawh angin inbiakna kan nei ngei a, hetah hian chawlh hman pahin training a nei bawk. Kan inbiakna pawh a kaltluangin ka hria a, kan tan kan hmachhawp te lo hrilhna hun tha a ni a, kan nihna leh kan duhdan te kan hrilh. Kan inbiak leh theih ka beisei hle a, midang pawhin inbiakna an neihpui bawk a ni,” tiin a sawi.

Season kal mekah Reims tan Balogun hi a che tha hle a, tunah hian Ligue 1-ah PSG forward Kylian Mbappe leh Lille striker Jonathan David te chiah ani aia goal khung hnem an awm a ni.