USA hmachhawn thei tur Kane

24th November 2022, 03:11PM

England captain Harry kane-a ke rek hliam endikna result chu a tha tih tarlan a ni. Kane hi Iran an hmachhawn tumin second half-ah a inhliam a, minute 76-na thleng a khel, Callum Wilson chuan a rawn thlak ta a nih kha.

Iran an hmachhawn tuma a inhliamna avang khan England fan-te an mangang hle. Mahse endikna result atang chuan Kane-a ke rekah hian engmah tha lo a awm lo nia report a ni.

England boss Gareth Southgate khan Iran an hneh hnu khan," Harry chu a tha turah ka ngai, a nat hmel viau a, mahse game kha a chhunzawn leh thei tho chu a nia. Kan lakchhuah nachhan kha chu a hun nia kan hriat vang a ni," tiin a sawi.

England keeper Jordan Pickford pawhin," A thain ka hria, a hliam na lo turah ka ngai, kan captain a ni a, a that ka beisei," tiin Kane-a chungchang nilaini khan a sawi.

Iran lakah khan goal khung ve lo mah se goal 2 a assist a, team tana a tangkai zia chu a lantir tho a ni.

He Spurs striker hian England tana goal khung hnem ber Wayne Rooney-a record goal 53 chu goal 2 chauhin a phak lo. Qatar-ah hian a khum theih beiseina a sang hle.

England hian zirtawpah USA an hmachhawn dawn, knockout stage thleng turin an dinhmun a ziaawm deuh.

USA hian an khelh hmasak berah 1-1 in Wales an inhnehtawkpui. Tim Weah chuan US tan goal hmahruai khungin Gareth Bale chuan penalty Wales an si phurh a rawn sut.

England leh USA inhmachhawn tur hi a hmuhnawm a rinawm, Iran kha England tan chuan an nem deuh tih a lang. Harry Kane pawh Ningani khan training a zawm a, harsatna a nei lo tih media ten an tarlang a ni.

Copyright © inkhel.com 2022. All rights reserved.