Flushing Meadows, New York-a US Open hmeichhe final khelhah World number one leh champion lai Aryna Sabalenka chuan harsatna nei lem loin Amanda Anisimova a hneh a, kumina Grand Slam trophy a lak hmasak ber niin, US Open title hi a humhim ta a ni.

Sabalenka hian  6-3 7-6 (7-3) -in Amanda hi a hneh a, hnehna a chan ve leh Belarusian chu a thingthi a, hlim takin kumina a Grand Slam title hmasa ber a lawm a ni.

Set khatnaah hian 6-3 in awlsam takin hnehna a chang a, set hnihna erawh tie break an khel a, hetah hian 7-3 in hnehna a chang ta a ni.

"Final vawi hnihah ka tlawm ve ve a, chumi hnua hnehna ka chang hi ka lawm lutuk mahni ka inthunun zo lo a ni. Chak loh leh hi ka duh tawh lo a ni," tiin Sabalenka chuan a sawi.

Anisimova hian double faults vawi 7 lai a nei a, Arthur Ashe Stadium in chunga floodlights eng lutuk chu a mawhpuh deuh.

"Nipui ropui tak ka hmang a, chutih laiin final vawi hnihah ka tlawm ve. Ka suangtuahna tipuitling turin ka bei nasa tawk lo deuh bawk a ni," tiin Anisimova chuan a sawi.