US hmeichhe football team head-coach Jill Ellis chuan US hmeichhe team chu Women's World Cup a chawipui hnu lawkah a hna a kalsan dawn.

Kum 52 mi Ellis hi kum 2014 khan US Women’s Team head-coach atan rawih tan a ni a, kum 2015 khan USA chu kum 16 hnuah World Cup nomawi a chawipuia, kumin World Cup-ah an title an humhim leh bawk.

Ellis hi October thla a zawh rualin US head-coach a nihna pawh a zo ve nghal dawn a, tunah hian US chuan ‘Victory Tour’ nei dawnin, game nga an khel dawn a, hemi zawh rual hian Ellis hi US Women’s team head-coach a nihna atangin a bang fel ang.

Ellis hian US hmeichhe team a enkawl hnuah game 102-ah hnehna a chanpuia, vawi 7 an tumpuite inhnehtawkpuiin, vawi 18 an tlawm bawk.

Kum 2015 khan Ellis hi FIFA leh CONCACAF Women’s Coach of the Year lawmman hlan a lo ni tawh a, Women’s World Cup title pahnih la thei hmasa ber leh awmchhun a ni.

Ellis hi Portsmouth, England-a piang a ni a, mahse kum 20 pawh a tlin hma in USA lamah a pema, US citizenship leh UK citizenship a nei kawp. Ellis hi ban a ni lova, a duh thu in he hna hi kalsan tur a ni a, a tan thil thlakdanglam a hun a tih vanga bang tur a nih thu a sawi.