Pathianni zan khan Manchester United chuan Old Trafford-ah Chelsea an mikhual a, team hnih te 1-1 in an inhnehtawk.

First half-ah goal lut lo mah se, team hnih ten chance hlauhawm an nei nual a, goal post an in petper sak tawn ve ve.

Second half -ah Hojlund chuan penalty a hlawhchhuak a, he penalty hi Bruno Fernandes chuan goal-ah a chantir. United-in hma an hruai rei lo, goal an khung atanga minute 4-na lekah Chelsea-in an siphurh an rul.

Caicedo chuan kawh zetin United goal bottom corner-ah a chhuih lut a, team hnih te 1-1 in an inhnehtawk.  Khelh 10 atangin Chelsea chuan point 18 an nei a, top 4-ah an awm. United erawh 13-na an ni.

Inkhelh zawhah United captain Bruno Fernandes chuan Erik ten Hag a thlah a, chhuahtir ngai khawpa a awm chu player te thiam loh a nih thu a sawichhuak.

"Kan hriat theuh angin Erik chu a chhuak ta a, manager chhuahtir ngai khawp dinhmuna kan ding hi a zia lo khawp mai. Kan team hi kan tha tawk lo a, kan result hlawhchhuah hi a tha tawk lo a ni.

"Manager chhuahtir a nih chhan hi player te vang a ni pakhat a, a bik takin kei hi ka khel tha tawk lo bawk a ni.

"Player 15 chuang chhuahtir ai chuan, manager pakhat chhuahtir mai kha a awlsam zawk vang mai a ni. 

"Ten Hag ka be pawp a, ngaihdam te ka dil nghe nghe. Theihtawp chhuahpui ka tum, mahse a pawi ka ti tak zet zet. Goal ka khung lo a, goal kan khung tam lo bawk a, mimal takin ka inthiamlo hle a ni," tiin Bruno Fernandes chuan a sawi.

Ten Hag a chhuah hnuah Ruud van Nistelrooy chu interim manager atan United-in an chhawr. Carabao Cup-ah 5-2 laiin hnehna a chanpui a, Chelsea nen 1-1 in an inhnehtawk chhunzawm bawk.

Nistelrooy-a hnuaiah player te an phur thar a, Ten Hag-a hnuaia an khelh lai ai chuan an game pawh a hmuhnawm deuh. Chutih laiin United captain hlui Roy Keane chuan tuna Red Devils player te hi an that tawk loh thu a lo sawi ve mek a, Ruben Amorim chuan hun a mamawh tur thu a sawi.

"Ruben hian contract rei zawk a ziah a ngai a ni. Hun rei tak ata tawh United team hi a dik tawh lo.

"An player te hi player pangngai ve mai an ni hlawm, stats atangin a chiang mai, an tha tawk lo a ni.

"An inkhel reng reng hi en a hahthlak a, top 4-a awm tur pawhin an beih fe a ngai tawh a ni.

"Player te chuan tha viau angah inngai mah se, ka hmuh danah chuan player pangngai satliah ve mai an ni, danglamna an nei lo," tiin Football pundit Roy Keane chuan a sawi.