Brighton an hneh loh hnuin Ruben Amorim a lawm lo hle a, "United history-a team chhe ber kan ni hial maithei a ni," tiin interview-naah a sawi chhuak.

Pathianni zan khan Old Trafford-ah Yankuba Minteh, Kaoru Mitoma leh Georginio Rutter te chuan mikhual tan goal an khung a, United aṭangin Bruno Fernandes chuan penalty a pet goal ve a, 3-1 in Brighton an chak.

United hi an league game hnuhnung 6-ah vawi 4 an tlawm ta a, top 4 hi point 12 laiin an phak lo a, relegation zone-a awm mek te nen point 10 chiahin an inthlau bawk.

"Premier League game hnuhnung 10-ah vawi 2 chiah hnehna kan chang. Ka tan leh United supporter te tan chuan han ngaihtuah mai pawhin a lungawi thlak loh a ni.

"Coach thar an nei a, coach an ban tak ai pawhin a chak lo hnem ta zawk chu a nia. Dam khawchhuah hram hram kan mamawh ta a ni.

"Manchester United history-a team chhe ber kan ni hial maithei a ni. Danglamna kan thlen a ngai a ni.

"A hautak khawp mai, kan harsatna hel lova kan sut tlang a ngai a ni. Zaninah te khan ka player zawng zawng te kha an ṭhat dan ang berin an khel chhuak lo.

"Kha kha pawm harsa tak a ni a, Premier League game-ah hian kan chak lo hnem malh malh lutuk. Hun harsa tak kan tawng mek, mahse theihtawp kan chhuah zel ang.

"Kan khingpui te kha kawng engkimah keini aiin an chungnung zawk. Chuvang chu a nia, kan game-ah ngelnghehna a awm theih lo. Ka player te pawh ka ṭanpui thei lo a ni tun dinhmunah hi chuan," tiin Ruben Amorim chuan a sawi.