Manuel Ugarte chuan Manchester United tan a debut game a khel tawh dawn niin Erik ten Hag chuan a sawi.

Tun inrinni hian Manchester United chuan Southampton an hmachhawn dawn a, Rasmus Hojlund leh Luke Shaw te erawh an la dam chiang lo a, hma erawh an sawn hle niin Ten Hag chuan a sawi bawk.

Kum 23 mi Ugarte hian tun international break lai khan ram tan a inlan a, World Cup qualifier match-a Venezuela an hmachhawn tumin min 90 a khel. Ningani khan Carrington-ah a kir leh nghal a ni.

"Rasmus Hojlund leh Luke Shaw te chuan hma an sawn zel a, mahse tun inrinni match-ah erawh an la inlan thei dawn lo.

"Manuel Ugarte erawh Uruguay tana a game kan hmu vek a, vawiin khan lo kir leh nghalin, vawiina player lo haw awmchhun a ni a, mi dang zawng chu nimin khan an lo kir. Inrinni hian inkhel thei turin an inpeih a ni," tiin Ten Hag chuan a sawi.

Tun nipui bazar inhawn lai khan Paris Saint-Germain atangin Ugarte hian Old Trafford a pan a, a man hi €50million (£42.3m; $55.8m) bakah add-ons €10m a ni.

Old Trafford-ah kum 5 chhung atan contract a ziak a, hetah hian thla 12-a pawhsei theihna ziah tel a ni bawk. An game hnuhnung bera Liverpool an hneh loh khan Old Trafford-ah Ugarte hian inkhel a en ve a ni.

Kha match-ah khan Liverpool chuan an sawp hle a nih kha, Casemiro chu half time-ah lak chhuah a ni a, kum 20 mi Toby Collyer chuan a thlak.

Tun season Premier League gamer 3 an khelh tawhah United hian hnehna vawi khat an chang a, vawi hnih an tlawm.

"Pawn lam thawm hian min tibuai lo. Club chhunga kan hnathawh hi ka hrechiang a ni. Team insiamrem mek kan ni a, player naupang zawk te nen team tha tak din tumin hma kan la mek.

"Player inhliam kan nei nual a, anni pawh an lo kir leh chho zel ang a, chak chhoh ngar ngar kan tum tawh dawn a ni," tiin Ten Hag chuan a sawi bawk.