Alexis Sanchez-a'n Arsenal atanga Manchester United a pan kha chu a tifuh lo ve thlawt a ni. Amah ngei pawh United a zawm hlimah a inchhir nghal bawk.

Manchester United tan Sanchez hian game 45 atangin goal 5 chiah a khung a, a contract kha inhriatthiam tawnna hmangin an titawp ta bawk a nih kha.

Arsenal tan khan ropui takin a khel, goal 80 lai a khung bawk. Kum 2018 khan Sanchez chuan Man City pan theihna hun remchang tak nei mah se, Old Trafford lam a pan ta zawk.

"United nen inremna kan neih hma khan manchester City pan thei dinhmunah ka ding. Mahse football khelh dan ka thlirin, Man United kha ka tana tha zawk tur niin ka ngai a, Old Trafford ka pan ta zawk a ni.

"United hi ka naupan lai atanga ka club ngainat a ni, mahse kan inlak luh hma khan club chhung boruak engmah ka lo zawt lo kha ka tihsual a ni.  A chang hi chuan kan luhchilh hma hi chu a pawn lam atang hian kan hre thei lo ve bawk a ni.

"Training hmasa ber United-ah ka nei a, thil tha lo tam tak kan hre nghal. Training ka neih zawhah, ka chhung te leh ka agent hnenah, 'Contract titawpin Arsenal lamah ka kir leh thei ang em?' ka ti. Anni chu an nui dar dar nghe nghe. Thil dik lo kha a awm tlat a ni.

"Mahse contract ka ziak fel vek tawh si, thla khat hun ka hmang a, hrehawm ka ti a, United team kha kan inpumkhat lo a ni khatih lai khan," tiin Alexis Sanchez chuan a sawi.

United tan game 45 chauh khelin, goal 5 a khung ve. Kum 2020 khan a contract tihtawp a ni a, Inter Milan lam a pan ta a, Italy-ah erawh nuam titakin a inkhel a, kum 2022 khan Marseille a pan chhunzawm bawk.