Bryan Mbeumo chuan Manchester United zawm a duh thu a sawi chhuak a, Brentford chuan United nena inbiak an inpeih reng thu an sawi ve ta bawk e.
Kum 25 mi Mbeumo hian Gtech Community Stadium-ah hian kum 1 chiah contract a nei tawh a, hetah hian thla 12-a pawhsei theihna ziah tel a ni bawk.
Kum 2019 khan Cameroon international hian French club Troyes atangin Brentford hi a zawm a, season liamta khan goal 20 a khung bakah assist vawi 8 a nei.
Premier League club lian tak tak Arsenal, Newcastle United leh Tottenham te chuan Mbeumo hi an ngaihven a, hetih lai hian Manchester United zawm a duh thu a sawi chhuak ta a ni.
Thla hmasa khan Brentford head coach Thomas Frank chuan, "Kan duhthusam ang pawisa an rawn ken chuan, keini pawhin chhuahtir kan hnial dawn lo. Chutih laiin a man hi a tlawm hauh lo ang," tiin a lo sawi tawh a nih kha.
Mbeumo hi hmatawng lamah chuan duh duhnaah a chhawr theih a, a sirah leh a laiah a chhawr theih ve ve. Team khawng tak Brentford-in an neih chhoh theihna chhan chu Mbeumo hi a ni kan ti thei bawk awm e.
Brentford-a season hnih a hman hnuin, Championship playoffs atangin Premier League a kaipui. A season hmasa berah goal 8, a dawtah goal 9, a season thumnaah goal 9 bawk a khung. Season liamta zet kha chu a che ropui khawp mai.
Cameroon tan vawi 18 a inlan tawh a, goal 4 a khung ve tawh a ni. Brentford chuan Mbeumo hi player talent nei tha tak a ni tih an hre chiang. Kum 2019 August thla khan an club record transfer fee £5.4million-in an la lut.
An defender hlui Pontus Jansson chuan, "France atangin player naupang talent nei tha tak kan lei dawn. Kum hnih thum chhung leka world-class player a rawn ni lo a nih chuan, kan hnual khawp ang le," tiin a lo sawi tawh a nih kha.
A hmasawnna a zuanin a zuang lem lo, kum 6 chhung rinawm takin Brentford tan a khel a, season liamta zet kha chu a rawn che ropui miah miah hle.
Player fak hlawh em em a ni lem lo, social media leh football pundit te pawhin an fak vak lo. Mahse Europe club lian te chuan tunah hian an ngaihven reng tawh a, Brentford-ah hian kum 2026 thleng daih contract a la nei a, Old Trafford lam a pan a rinawm ta hle a ni.