United lei tum zingah Thomas Zilliacus tel

24th March 2023, 07:03PM

Finnish entrepreneur Thomas Zilliacus chuan Manchester United lei tumin chhanna (bid) a thehlut ve tih a sawi.

Zilliacus hian thuneihna 50% chan a rilruk a, 50% dang chu fan-te lei turin a dah. Fan-te hi club inrelbawlnaa tel ve turin a duh a, club tana mi tangkai an nih avangin a dahsang hle.

Nilaini zanlai thleng khan dilna thehluh hun an hawng a, thil hriat chianloh a awm avangin a hnuah an pawtsei. An pawhsei leh hi engtikah nge a tawp dawn an sawi rih lova, hunrei tak chu anih a rinawm loh.

Zilliacus chuan, "Sport huang chhunga team awm zawng zawngah hian fan-te'n thu an nei ve tur a ni. Mahni hamthatna ngaihtuah lovin Manchester United hi lei ka tum a, fan-te nen intluk tlang taka enkawl ka duh.

"Suma buai lo Sheik Jassim leh mi hausa tawntaw Ratcliff-te'n lei tumin hma an la nasa khawp mai a, keichuan anni hi club kaihruai turin ka duh lo. United hlutna tun dinhmunah $3.9bn chiah ani a, fanclub hrang hrangte an in zawmkhawm anih chuan mi pakhatin $6 bak thawh a ngai lo. Fans zawng zawng an tel anih pheichuan thil tih a awlsam dawn a, mi pakhat tan $3 thawh tlin pawh a ngai lo." tiin a sawi.

Zilliacus hian United fan-te ngaihdan lakkhawm a tum a, phone hmanga vote theih turin mobile application a siam ang. Hetah hian fans zawng zawngin ngaihdan an sawi thei dawn a, an inhuam dan a zirin thutlukna a siam ang.

Red Devils lei tumtu hi an awm nual niin BBC Sport chuan an ziak a, mipui vantlang hriat chuan Ineos neitupa Sir Jim Ratcliffe leh Qatari banker Sheikh Jassim-te chiah sawilan anni thung. Tun thla tir lam khan Old Trafford leh a chehvel an fang a, United hruaitute nen inkawm hona hun an nei.

US investment company Elliott pawhin thuneihna neih ve an rilruk a, tute pawhin lei se tel ve an pawi tilo tih an sawi tawh. Zilliacus hian Finland professional football club HJK Helsinki leh Ice Hockey champion Jokerit-ah thuneihna a chelh mek a, social media group novaM Group-ah chairman ani mek bawk.

Manchester United hi XXI Century Capital kaltlangin lei a rilruk a, he company hi ama ta tho niin investment firm an ni.

Copyright © inkhel.com 2024. All rights reserved.