Premier League club pahnih Manchester United leh Newcastle te chuan Stuttgart striker Serhou Guirassy an duh ve ve a, , January thlaah Guirassy hi lakluh an tum niin chanchinbu mite chuan a tarlang.

Premier League club dang Fulham pawhin Guirassy hi duh viau mah se, United leh Newcastle te an inelpui thei dawn lo tih an inhriat avangin an inhnukdawk fel tawh nia sawi a ni a, United leh Newcastle te hian Guirassy hi an hnaih zel nia tarlan a ni.

Guirassy hi tun season-ah a che tha hle a, Europe league lian hova goal thei ber zinga mi niin, Stuttgart tan hian competition hrang hranga game 12 a khelh tawhah goal 17 a khung tawh a, assist vawi hnih a nei tawh bawk.

Inrinni liamta mai pawh khan Stuttgart in si hnih faia Werder Bremen an hneh tum khan kum 27 mi hian goal a khung leh a, January thla-a thlasik bazara inhawn hunah United leh Newcastle te chuan bid an thehluh ngei a rinawm.

Guinea international hian Stuttgart-ah hian release clause pound maktaduai 15 chauh a nei niin chanchinbu mite chuan an ziak a, Stuttgart hian man tlawm taka an chan mai loh nan contract thar ziahpui an tum ve mek bawk.

Guirassy hi season hmasa khan Stuttgart-ah hian loan in a khel a, kumin nipui lai khan Stuttgart hian a nghetin an lalut a, tunah hian kum 2026 June thla thleng daih contract a nei a ni.