Pathianni zan khan Old Trafford-ah Arsenal chuan si khat faiin Manchester United an hneh. United-in player inhliam an ngah em em, team phuahchawp deuhin khel mah se, Arsenal an chai thei fu, chutih laiin chak phu zawk Arsenal an chak.

Inkhelh zawhah Arsenal boss Mikel Arteta chuan, "Old Trafford-a kan game 21 khelhah vawi 2 chiah hnehna kan chang thei, kha vang khan a harsa dawn tih kan hre sa. 

"Inkhelh bul kan tan tha em em a, goal kan khung chhunzawm avangin kan duh dan angin kan khelh theih phah.

"A him thei ang berin kan khel a, kan backpass nasa, kha khan kan attacking lam a ti hmuhnawm loh deuh. 

"A hnuah ball kan hloh nasa chho, kha vang khan kan tlarhnung pawh kan buai deuh hman hle, mahse tha takin kan inveng a,kan insiamtha chho leh.

"Team pumpui khelh dan ka fak a, kan vaiin kan khel tha  ani. Second half-a kan khelh danah pawh ka lawm hle.

"Spurs kan hmachhawn ang khan United hi khelh an harsa hle, mahse hnehna kan chang a, a lawmawm hle," tiin a sawi.