Rasmus Hojlund a chhuak a nih chuan, Manchester United chuan Aston Villa striker Ollie Watkins an ngaihven dawn niin the Athletic chuan a tarlang.

United hotute leh Villa hotute chu Watkins chungchangah hian an indawr nual tawh a, United hian lak chhuah theih dan a awm leh awm loh te an dap mek nia report a ni.

Nikuma Marcus Rashford chungchangah United leh Villa te an indawr lai khan, Watkins chungchang hi sawi tel a ni a, United hian Rashford hi £40million (€46.7m; $54.8m) velin hralh an phal. Loan-in Villa Park lamah khel mah se, Rashford hian Barcelona lam khelh a chak miau a, Watkins nena inthleng tawn chungchang an sawi zui hleithei lo nia report a ni.

United hian Brentford atangin Bryan Mbeumo lak tumin hma an la mek a, vawi hnih indawrna nei tawh mah se, a tlawlh ve ve. Engtin nge an kalpui zel dawn tih erawh a la hriat loh. 

Watkins hian Villa tan Premier League game 184 atangin goal 75 a khung tawh a, season 5 liamta chhung khan goal 10 leh a aia tam a khung ziah. Season liamta khan Premier League-ah goals+assists 24 lai a nei leh a, Alexander Isak (29) leh Erling Haaland (25) te chiah striker zingah a phak lo a ni.

Watkins hi kum 29 a ni ve tawh a, a vanglai a liam chho ve mai dawn. Hetih lai hian United chuan Premier League lama tawnhriat nei ngah tawh striker an dap niin a lang.