Manchester United-in an ambassador Sir Alex Ferguson-a contract an tihtawp chungchangah, Eric Cantona a tawngchhuak ve nghal a, United chet dan chu na taka demin, an zahpuiawm thu a sawi chhuak hial.
Kum 26 chhung teh meuh mai ropui takin Sir Alex hian United a enkawl a, trophy 38 lai chawipuiin, kum 2013 khan football manager hna a chawlhsan ta a nih kha. A chawlh atang khan club ambassador atan hman a ni chhunzawm a, a hlawhah kum tin £2.16million vel pek ziah a ni.
Manchester United neitu zinga tel thar INEOS chuan club sum dinhmun siamthat an duh a, thil tangkai lo nia an ngaih te an paihthla ta nghauh nghauh mai. Chung zingah chuan Sir Alex Ferguson-a contract pawh an tihtawp sak a, staff eng emaw zat an ban dawn bawk nia report a ni.
Kum 82 mi Ferguson hi United non-executive director atan ruat a ni chhunzawm dawn tho a, a duh hun hunah Old Trafford-ah United inkhel a en phalsak a ni bawk.
United chet dan chungchangah kum 58 mi Manchester United forward hlui Eric Cantona chu instagram lamah a tawngchhuak ve nghal.
"Sir Alex Ferguson hi United-ah a duh zawng chu tih phalsak zel ni se, a thih ni thlengin chutiang chuan club-in zah takin ngaipawimawh rawh se.
"Tuna club chet dan hi chu, an zah hlawl lo a ni. Sir Alex Ferguson hi kei chuan chatuanin ka boss a ni reng tawh ang," tiin a tarlang.
Cantona hian kum 1992 khan Leeds United atangin Manchester United a zawm a, United icon ni chho nghalin, Premier League title 4 a la a, goal 70 khung tlingin, United tan game 156 a khel hman bawk.
Sir Alex hi United rohlu a ni a, Old Trafford-a kum 26 a cham chhungin Premier League title 13 lai a lakpui a, Champions League no mawi 2, FA Cup 5 leh League Cup 4 a chawipui.
United defender hlui Rio Ferdinand pawh a tawngchhuak ve nghal. "Tunah chuan United-ah hian tumah an him tawh lo," ti hialin kum 2002-a British Record-a Sir Alex-a'n a lak luh Ferdinand a tawng.
United hian tun season bul an tan tha lo hle, Europa League match an khelh hmasak pahnihah an khingpui an inhnehtawkpui ve ve.
Premier League game 7 khelh tawh a ni a, point 8 chauh hlawhchhuakin, table-ah 14-na an ni mek a, Erik ten Hag-a dinhmun a derthawng hle nia ngaih a nih laiin, an la inchhawr chhunzawm zel dawn a nih hmel. Tun inrinni zan hian Brentford an hmachhawn ang.