Manchester United chuan Benjamin Sesko chungchangah RB Leipzig an dawr ta niin The Athletic chuan a tarlang.
Hetih lai hian official tak erawh chuan United hian an la dawr lo a, lak chhuah theih dan a awm mial lo maw? tiin United chuan an thlithlai mek a ni.
Newcastle United pawhin kum 22 mi hi lak an tum ruh hle a, Alexander Isak chuan St James's Park chhuahsan a duh a, Isak a chhuak a nih chuan Newcastle United hian theihtawpa Sesko lak tumin hma an lak a rinawm.
Ruben Amorim-a team te hian Aston Villa forward Ollie Watkins chu an ngaihven na zawk nia sawi a ni a, ani hi Premier League lamah a lo tlangnel sa tawh a, hei vang hian Amorim hian lak theih dan a ngaihven mek.
Hetih lai hian kum 29 mi hi Villa chuan hralh an phal loh thu United an hrilh chiang tawh. Tin, United hotute chuan Watkins-a man tur vel an han ngaihtuah hian, sum an thehchhuak ngam chiah lo niin The Athletic chuan a tarlang bawk.
United hian tun nipui bazarah hmatawng lam Matheus Cunha leh Bryan Mbeumo te an la tawh a, striker an la dawn a nih chuan, Sesko emaw Watkins emaw lak an tum dawn nia report a ni.
Kum 2019 khan United hian Sesko hi lak theihna hun remchang an nei a, a man atan an chhiar zat €3million kha United hian an pe ngam lo a, to an ti hle.
Seson hian kum 2029 thleng RB Leipzig-ah contract a la nei a, nikum mai khan contract thar a ziak a, club lian-in €80m-€90m (£69m to £78m) an thehchhuak a nih chuan, Sesko hi Leipzig hian an chhuahtir mai a rinawm.
Kum 2023 khan Sesko hian Red Bull Salzburg atangin RB Leipzig a zawm a, Leipzig tan game 87 a khel tawh a, goal 39 khung tawhin, assist vawi 8 a nei tawh bawk.
Slovenia tan kum 18 a nihin a inlan tan a, game 41 atangin goal 16 a khung a, Euro 2024-ah pawh khan ram tan a fehchhuak ve bawk a ni.
United hian kum 16 a nih lai atang tawhin Sesko hi an lo thlithlai tawh a, Domzale-a a khelh lai kha niin, khatih laia a man an chhiar zat kha United chuan an pe ngam lo.
Kum 2022 khan an ngaihven leh a, mahse Sesko chuan Leipzig pan a thlang zawk a, nikum nipui bazarah khan United chuan an ngaihven leh a, mahse Leipzig-a cham chhunzawm a thlang a, United chuan Joshua Zirkzee an la ta zawk a ni.
United hian striker an la dawn nge dawn lo a hriat chiah loh a, an lei dawn a nih chuan Sesko emaw Watkins emaw lak an tum dawn nia report a ni. Hetih lai hian Hojlund hi chher hriam an tum zawk maithei bawk.