Manchester United chuan an forward tun season daih bak contract nei tawh lo Marcus Rashford chu, a thlawna a chhuah mai loh nan thla 12 danga a contract pawh sei theihna an neih chu hman tangkai an tum niin chanchinbu mi te chuan an ziak.

United hian Rashford hi kum nga daih contract thar ziahpui tum mah se, an hlawhtling dawn em tih a sawi theih lova, contract thar an ziahpui theih loh chuan thla 12 dangin a contract hi an pawt sei dawn niin a lang.

Daily Star-in a tarlan danin, United hian World Cup hma ngeiin kum 24 mi hun rei daih contract ziahpui an tum a, World Cup-a an inrempui theih loh chuan a contract hi kum khat danga pawhsei belh phawt a, indawrna neihpui chhunzawm an tum.

United hian English forward hi contract thar an ziahpui theih lova, a contract an pawtsei lo bawk a nih chuan, January thla atangin Rashford hi club dang nen an indawr thei dawn a, pre-contract pawh an ziak thei dawn a, hei hi United chuan a thlen loh nan theihtawp an chhuah.

Rashford hi United academy chhuak a ni a, a professional career United-ah bak hun la hmang lo mah se, United chhuahsan a duh tan nia sawi a tam hle a, a agent te leh United te chu contract thar chungchangah an indawr mek niin chanchinbu mi te chuan an tarlang a ni.