Manchester United manager Erik ten Hag chuan a player thenkhat chhuah tir a, an squad tih thawl a tum mek a, January thla-a thlasik bazar inhawn hunah pawh player pathum hralh tum langsar a nei niin chanchinbu mite chuan an tarlang.

Thla leh maiah winter transfer window a inhawng dawn a, Ten Hag hian Casemiro, Raphael Varane leh Jadon Sancho te an man phu tawka dawrtu an awm a nih chuan a chhuah tir phal nia sawi a ni.

Sancho hi United chhuahsan tura rin sa a ni a, Ten Hag nen inti thiam lovin, September thla hnuah Dutch manager hian English winger hi a la chhawr leh lova, Sancho hi dawrtu an awm phawt chuan United hian man to lutuk lova an hralh phal a rinawm hle.

Real Madrid atanga an lakluh pahnih Casemiro leh Varane te pawh tun season-ah Ten Hag hian rinrawl berah a hmang tawh lova, player an mamawh zawk an lei theih nan anni pahnih pawh hi chhuah tir a tum niin chanchinbu mite chuan an ziak.

Kumin nipui bazar lai khan United hian Harry Maguire leh Scott McTominay chu hralh chhuah tum mah se an hlawhchham a, tun season-ah Maguire leh McTominay te hi an khelh that chhoh mek avangin United hian hralh an tum tawh rih lo nia tarlan a ni.