Manchester United goalkeeper Andre Onana chuan loan-in tun season chhung atan Trabzonspor a zawm fel ta a, United hian Onana hi hralh an la phal chiah lo niin a lang a, loan inremnaah hian lei theihna ziah tel a ni ta lo.

Zirtawpni hian Turkey-ah transfer window khar a ni dawn a, tun season Premier League-ah Onana hi United tan a la inlan lo a, Carabao Cup-ah erawh inlanin, League Two club Grimsby lakah an tlawm, kha match-ah khan Onana chuan tihsual langsar deuh vawi hnih a nei leh nghe nghe.

Manchester United chuan, "Vanneihna chang turin Andre duhsakna kan hlan a che," tiin an goalkeeper hi an thlah a ni.

Kum 29 mi hian kum 2023 July thla khan Inter atangin Manchester United a zawm a, an inleina kha £47.2m niin, Erik ten Hag chuan United number one goalkeeper De Gea chu contract thar a ziahpui tawh lo a, a thehchhuak ta a nih kha.

Manchester United tan Andre Onana hian game 102 a khel a, goal 150 lai a chhuah, clean sheet vawi 24 a nei a, 2024 FA Cup champion team-ah khan a tel ve a ni.

United chuan kum 23 mi Belgian goalkeeper Senne Lammens an lei a, Royal Antwerp atanga an inleina hi 21m euros (£18.1m) bakah add-ons a tel nia report a ni.

Trabzonspor chuan tun weekend-a league match-ah Onana hi khel nghal se an duh a, Manchester United chuan tun Pathianni hian Manchester Derby an khel dawn a, Lammens, Bayindir leh Tom Heaton te chu goalkeeper duhthlan tur an neih an ni.