Scott McTominay chuan nipui bazar tawpniah Napoli a zawm a, an inleina hi £25.7m nia report a ni.

Kum 27 mi hi Manchester United academy chhuak a ni a, kum 5 mi a nih atangin United player a ni tawh a, kum tam tak Old Trafford-a hun a hman hnuin a chhuak ta a ni.

McTominay hian kum 2017 khan United tan a debut game a khel a, Red Devils tan game 255 a khel hman a, season liamta khan competition hrang hrangah game 43 khelin, goal 10 a khung a ni.

United hian PSG atanga Manuel Ugarte lak luh an duh avangin, loh theih lohin an academy player McTominay hi an thehchhuak ta nia report a ni.

"United-a hun ka hman chhung kha nuam ka ti a, ka ngaina em em. Chutih laiin chona thar hmachhawn ka duh a, chumi lam chu ka pan ta a ni.

"Manchester United hian hnehna chang chho zel se, tha takin khel chho zel se ka duh a, ka lo thlir reng dawn che u a ni. United mi leh sa ka ni kha ka lawm a, United tana ka hun hman zawng zawng kha ka hlimpui a ni," tiin McTominay chuan Manchester United a thlah.

Premier League's Profit and Sustainability Rules (PSR) an bawhchhiat loh nan United chuan an academy chhuak an hralh a ngai a, McTominay hi an hralh ta nia tarlan a ni.

Manchester United boss Erik ten Hag chuan, "McTominay hi ka ngainat zawng a ni a, chutih laiin kan hralh ta hi kan tana tha tur a ni bawk si a, ka ui em em a, mahse kan hralh erawh a tha tho bawk si a. Ka duhthusam chu hralh loh theih hi a la ni fan a ni.

"Team tana player tangkai a ni a, mahse Manchester United hian dan kan zawm erawh a ngai si.

"Dan chungchang kan sawi ho a, academy chhuak player hralh hi a hlawk em em a, chutih laiin kan ui hle bawk si.

"Engpawh ni se, a tua tan pawh inremna tha a ni a, Scott pawh a hlim a, Napoli pawhin player tha tak an la a, kan hlim tlang e," tiin a sawi ve bawk.