Manchester United chuan Bryan Mbeumo lak chhuah nan pawisa nen a vawi khat nan Brentford an dawr a, Mbeumo manah hian United chuan £45million bakah add-ons £10m an thehchhuak phawt.

Brentford phut zat erawh a ni lo tlat, hei aia to hian Brentford chuan Cameroon international forward hi hralh an duh. Inbiakna kalpui chhoh zel a ni dawn niin The Athletic chuan a tarlang a, Ruben Amorim hian hmatawng thuam that nana a mi duh hi lak ngei a tum mek a ni.

Kum 25 mi Mbeumo hian Gtech Community Stadium-ah hian kum 1 chiah contract a nei tawh a, hetah hian thla 12-a pawhsei theihna ziah tel a ni bawk.

Kum 2019 khan Cameroon international hian French club Troyes atangin Brentford hi a zawm a, season liamta khan goal 20 a khung bakah assist vawi 8 a nei.

Premier League club lian tak tak leh season thara Europe-a inlan tur Arsenal, Newcastle United leh Tottenham te chuan Mbeumo hi an dawr a, hetih lai hian Brentford forward hian Premier League table-a 15-na zawm a duh thu a sawi chhuak a nih kha.

Thla hmasa khan Brentford head coach Thomas Frank chuan, "Kan duhthusam ang pawisa an rawn ken chuan, keini pawhin chhuahtir kan hnial dawn lo. Chutih laiin a man hi a tlawm hauh lo ang," tiin a lo sawi tawh a nih kha.

Mbeumo hi hmatawng lamah chuan duh duhnaah a chhawr theih a, a sirah leh a laiah a chhawr theih ve ve. Team khawng tak Brentford-in an neih chhoh theihna chhan chu Mbeumo hi a ni kan ti thei bawk awm e.

Brentford-a season hnih a hman hnuin, Championship playoffs atangin Premier League a kaipui. A season hmasa berah goal 8, a dawtah goal 9, a season thumnaah goal 9 bawk a khung. Season liamta zet kha chu a che ropui khawp mai.

Cameroon tan vawi 18 a inlan tawh a, goal 4 a khung ve tawh a ni. Brentford chuan Mbeumo hi player talent nei tha tak a ni tih an hre chiang.  Kum 2019 August thla khan an club record transfer fee £5.4million-in an la lut.