Manchester United chuan nipui bazar a inhawn hunah, an player pahnih Harry Maguire leh Anthony Martial te chu hralh chhuah an tum niin Manchester Evening News chuan a tarlang.

United hian nipuiah striker thar lakluh an duh a, chumi atan chuan an squad paih thawl deuh an tum niin a lang a, Maguire leh Martial te bakah hian Alex Telles pawh hralh an tum nia sawi a ni.

Martial hi tun season-ah hliamin a tlakbuak nasa hle a, tunah pawh hian inhliam meikin, a inhliam avangin United game 34 khelh tawh atangin game 20 a khel thei lova, United hian Martial hi chhuah tira, a hmunruak hnawhkhat tura forward dang lakluh an duh niin chanchinbu mite chuan an tarlang.

United captain Maguire erawh starting XI atanga thlauhthlak a ni a, a inkhel tam lo hle a, amah ngei pawhin hian season tawpa United chhuahsan hi a duh nia report niin, thlasik bazar lai pawh khan dawrtu a nei tawh nghe nghe a ni.

Cristiano Ronaldo an chhuah tir hnuah, United hian loan in Wout Weghorst an lalut a, mahse Dutch striker hi lei zui theihna an nei lo. United hian nipui bazar inhawn hunah sum tam tak senga striker an lei ngei a rinawm a, Tottenhem striker Harry Kane leh, Napoli striker Victor Osimhen te chu United lakluh tum te zinga mi an nih thu tarlan a ni.

Season bul tan tha lo mah se, United hian hma an sawn hle a, Premier League lamah khelh 21 khel tawhin point 42 an hlawhchhuak tawha, pathumnaah awmin, pahnihnaa awm Manchester City chu point 3 in an pha lo a ni.