Bayern Munich chhuahsan duh nia report Mathys Tel chu Manchester United chuan loan hmanga lak an tum niin The Athletic chuan a tarlang.

Kum 19 mi hian sawmtu a nei nual, Chelsea, Tottenham leh Arsenal te chuan an ngaihven nia report a ni a, Manchester United pawhin an hmatawng indaih lohna phuhru turin Mathys Tel hi an ngaihven ve ta a ni.

Manchester United hian Bayern Munich chu an la dawr lo a, Tel erawh an dawr tawh niin The Athletic chuan a tarlang a, tun season chawhnu chhung atan United hian loan-a hawh an duh.

Antony chuan loan-in Real Betis a pan a, Marcus Rashford pawh loan-a chhuak tur nia ngaih a ni mek. Tin, Alejandro Garnacho pawh Chelsea leh Napoli te chuan an ngaihven mek bawk a, United hian hmatawng lama chhawr tur an nei tam lo viau thei.

Tun season-ah United goal khung hnem te chu Amad leh Bruno Fernandes te an ni mai a, Rasmus Hojlund leh Joshua Zirkzee te chuan goal an khung hleithei lo. Mathys Tel chu hun rei lo te chhung atana United mamawh phuhru turin Amorim chuan a ngai niin a lang.

Tel hian kum 2022 khan Rennes atangin Bayern Munich a pan a, German club tan hian game 82 a khel tawh a, goal 16 khung tawhin, assist vawi 7 a nei tawh bawk.

Kum 17 mi chauh a nih laiin Bayern Munich tan goal a khung a, 5-0 a Viktoria Cologne an hneh tumin Mathys Tel hian goal a khung, Bayern Munich tana goal khung thei naupang ber a ni.

A debut season-ah Tel hian goal 5 khung vein, 2022-23 Bundesliga title a la. Tun season chhungin Bayern Munich tan game 13 chiah a la inlan a, heng pawh hi bench atanga a luh te a ni hlawm. Bayern Munich game hnuhnung 3-ah bench-ah a thu a, chhawr a ni lo bawk.